گوہاٹی، 22 فروری (ہ س)۔

آسام کے وزیر اعلیٰ ڈاکٹر ہمنتا بسوا سرما نے اتوار کے روز آسام پردیش کانگریس کے سابق صدر بھوپین کمار بورا کا بی جے پی میں خیرمقدم کیا اور اسے ان کے لیے ایک نئی سیاسی اننگز کا آغاز قرار دیا۔

میڈیا سے بات کرتے ہوئے وزیر اعلیٰ نے کہا کہ بورا نے 32 سالوں سے کانگریس پارٹی کے لیے اہم خدمات انجام دی ہیں۔ انہوں نے کہا، بھوپین کمار بورا نے طویل عرصے تک کانگریس پارٹی کی خدمت کی ہے۔ آج، وہ اپنا نیا سیاسی سفر شروع کر رہے ہیں۔ میں ان کے لیے نیک خواہشات کا اظہار کرتا ہوں۔

بورا نے بی جے پی میں ریاستی بی جے پی صدر دلیپ سائکیا اور پارٹی کے ایم پی بائیجیانت پانڈا کی موجودگی میں شمولیت اختیار کی۔ ریاست میں ہونے والے اسمبلی انتخابات سے قبل اس پیش رفت کو سیاسی طور پر اہم سمجھا جا رہا ہے۔

چیف منسٹر نے پہلے ہی اشارہ دیا تھا کہ بورا کانگریس سے استعفیٰ دے کر بی جے پی میں شامل ہوجائیں گے۔ اپنے سیاسی سفر کو یاد کرتے ہوئے، بورا نے کہا کہ انہوں نے 32 سال تک کانگریس میں خدمات انجام دیں، ایم ایل اے سے لے کر آسام پردیش کانگریس کمیٹی کے صدر تک کے عہدوں پر فائز رہے۔

بورا نے کانگریس کے اندر اختلافات کا بھی ذکر کیا۔ انہوں نے کہا کہ پارٹی لیڈر گورو گوگوئی اور سینئر لیڈر رقیب الحسین کے ساتھ اندرونی بات چیت کے دوران انہیں اپنی توہین محسوس ہوئی۔ انہوں نے کہا کہ انہوں نے راہل گاندھی کو اپنی تشویش سے آگاہ کیا، لیکن کوئی جواب نہیں ملا۔

جب بورا 2021 میں اے پی سی سی کے صدر بنے تو کانگریس اے آئی یو ڈی ایف کے ساتھ اتحاد میں تھی، جسے بعد میں انہوں نے ختم کر دیا۔ انہوں نے یہ بھی دعویٰ کیا کہ انہوں نے انڈیا اتحاد کی تشکیل سے قبل آسام میں 16 جماعتوں کے ساتھ معاہدہ کیا تھا۔

بورا کی بی جے پی میں انٹری ایسے وقت میں ہوئی ہے جب ریاستی اسمبلی انتخابات کی تیاریاں تیز ہو رہی ہیں۔

ہندوستھان سماچار

ہندوستان سماچار / عطاءاللہ