ممبئی، 5 نومبر (ہ س)۔ اداکار سیف علی خان اور کرینہ کپور حال ہی میں ’کافی ود کرن 9‘ میں مہمان کی حیثیت سے پہنچے۔ شو کے دوران دونوں نے اپنے خاندان اور بچوں کے ساتھ رشتوں کے بارے میں کئی باتیں شیئر کیں۔ گفتگو کے دوران سیف نے کرینہ کی تعریف کرتے ہوئے کہا کہ انہوں نے ان کی پہلی شادی سے پیدا ہونے والے بچوں سارہ علی خان اور ابراہیم علی خان کے ساتھ ایک اچھا اور خوشگوار رشتہ قائم کرنے میں اہم کردار ادا کیا ہے۔

شو کے میزبان کرن جوہر نے سیف سے خاندان کے افراد کے درمیان باہمی تال میل اور رشتوں میں پیدا ہونے والی دوریوں کو کم کرنے کے بارے میں سوال کیا۔ اس پر سیف نے کہا کہ خاندان کے تمام افراد سمجھدار ہیں اور رشتوں کو بہتر بنانے میں سبھی کا تعاون رہا ہے۔ انہوں نے خاص طور پر کرینہ کا ذکر کرتے ہوئے کہا کہ وہ معاملات کو آسان بنا دیتی ہیں۔ کرینہ، سارہ اور ابراہیم کے ساتھ محبت سے پیش آتی ہیں اور دونوں بھی انہیں اتنا ہی اپنائیت اور پیار دیتے ہیں۔

کرینہ نے بھی سیف کے بڑے بیٹے ابراہیم اور اپنے بچوں تیمور اور جہانگیر کے رشتوں کے بارے میں بات کی۔ انہوں نے بتایا کہ ابراہیم اپنے چھوٹے بہن بھائیوں کے ساتھ کافی گھل مل کر رہتے ہیں۔ وہ ان کے ساتھ کھیلتے ہیں، ان کے کمرے میں جاتے ہیں اور ان سے بات چیت کرتے ہیں۔ کرینہ نے ابراہیم کو ایک پیارا انسان قرار دیتے ہوئے کہا کہ تینوں بچوں کے درمیان خاص قربت ہے۔

قابل ذکر ہے کہ سیف علی خان نے 1991 میں اداکارہ امرتا سنگھ سے شادی کی تھی اور 2004 میں دونوں کی طلاق ہو گئی تھی۔ اس کے بعد انہوں نے 2012 میں کرینہ کپور سے شادی کی۔

ہندوستان سماچار

---------------

ہندوستھان سماچار / عبدالسلام صدیقی