ممبئی، 10 اکتوبر (ہ س)۔ فلم ’پہلا پیار دوسری بار‘ کا نیا گانا ’جانے کس موڑ پہ‘ ریلیز کر دیا گیا ہے۔ گلوکار درشن راول کی آواز سے مزین اس گانے میں پہلے پیار کی یادوں، دوستی اور دوبارہ کسی سے ملنے کی امید کو خوبصورتی کے ساتھ پیش کیا گیا ہے۔ گانے کو ناظرین کی جانب سے اچھا ردعمل مل رہا ہے۔ ہلکی پھلکی موسیقی اور نوجوانوں کی محبت کے جذبات سے بھرپور یہ گیت فلم کی کہانی کے اہم پہلوو¿ں کو اجاگر کرتا ہے۔گانے میں تین دوستوں کو اسکول ری یونین کے لیے سفر کرتے ہوئے دکھایا گیا ہے۔ اس سفر کے پیچھے ان کی اپنے پہلے کرش یعنی پہلی پسند سے دوبارہ ملاقات کی امید چھپی ہوئی ہے۔ سفر کے دوران ان کے دلوں میں جوش و خروش کے ساتھ گھبراہٹ بھی ہے، کیونکہ انہیں معلوم نہیں کہ کئی سال بعد ہونے والی یہ ملاقات کیسی ہوگی اور زندگی انہیں کس موڑ پر لے جائے گی۔اس گانے کو درشن راول نے اپنی آواز دی ہے، جبکہ اس کے بول گرپریت سینی نے لکھے ہیں اور موسیقی روچک کوہلی نے ترتیب دی ہے۔ درشن راول کے مطابق، اس گانے میں انتظار اور امید کا ایسا احساس موجود ہے، جو سننے والوں کو ان کی پرانی یادوں میں واپس لے جا سکتا ہے۔ وہیں، روچک کوہلی نے موسیقی کے ذریعے پہلے پیار سے دوبارہ ملاقات کی بے چینی اور تجسس کو نمایاں کرنے کی کوشش کی ہے۔

ٹی سیریز میوزک پر ریلیز ہونے والے اس گانے میں فلم کے اداکار سپرش والیا، علیشا چوپڑا، کنال وید، ساکشی ویدیا، تشار چھبر اور سرگن کور لتھرا نظر آ رہے ہیں۔ فلم کے شریک پروڈیوسر لوو رنجن اور انکور گرگ ہیں۔نوجوانوں کی محبت، دوستی اور رشتوں کو نئے سرے سے سمجھنے کی کہانی پر مبنی یہ فلم 23 اکتوبر 2026 کو ملک بھر کے سینما گھروں میں ریلیز ہوگی۔

ہندوستھان سماچار

ہندوستان سماچار / Mohammad Khan