ممبئی، 3 نومبر (ہ س)۔ سال 2006 میں ریلیز ہونے والی کامیڈی فلم ’مالامال ویکلی‘ کے سیکوئل کو لے کر ایک بڑی تبدیلی سامنے آئی ہے۔ فلم کے اصل ہدایت کار پریہ درشن نے اس کے دوسرے پارٹ سے خود کو الگ کر لیا ہے۔ ان کے ساتھ ہی اداکار رتیش دیش مکھ بھی اس سیکوئل کا حصہ نہیں ہوں گے۔
ابتدا میں خبریں تھیں کہ نئی کہانی میں کچھ نئے اداکاروں کے ساتھ اصل فلم کے اداکار بھی نظر آئیں گے اور رتیش دیش مکھ کی واپسی تقریباً طے سمجھی جا رہی تھی۔ تاہم، اب ان دونوں کے پروجیکٹ سے الگ ہونے کے بعد فلم کی منصوبہ بندی میں تبدیلی کا امکان ہے۔
رپورٹ کے مطابق، پریہ درشن نے خود اس بات کی تصدیق کی ہے کہ وہ سیکوئل کی ہدایت کاری نہیں کریں گے۔ ان کا کہنا ہے، ”میں یہ فلم نہیں کر رہا ہوں۔ میں نے کوئی بھی سیکوئل نہ بنانے کا فیصلہ کیا ہے۔“ ان کے اس بیان سے واضح ہو گیا ہے کہ وہ اپنی مقبول کامیڈی فلم کے اگلے پارٹ کی ہدایت کاری نہیں کریں گے۔ وہیں، رتیش دیش مکھ کے بھی فلم سے وابستہ ہونے کا امکان ختم ہو گیا ہے۔
رپورٹس کے مطابق، ’مالامال ویکلی 2‘ میں روینہ ٹنڈن، پرینیتی چوپڑا، ایشا دیول، ایلویش یادو اور شلپا شروڈکر جیسے اداکار نظر آ سکتے ہیں۔ اس کے علاوہ اصل فلم کے پریش راول اور راج پال یادو کی واپسی کی بھی خبریں ہیں۔ بتایا جا رہا ہے کہ ان فنکاروں نے زبانی طور پر اپنی رضامندی دے دی ہے۔ فلم کی ہدایت کاری کی ذمہ داری امت جوشی کو سونپی گئی ہے، جو اس سے پہلے ’تیری باتوں میں ایسا الجھا جیا‘ کے شریک ہدایت کار رہ چکے ہیں۔
ہندوستھان سماچار
ہندوستھان سماچار / محمد شہزاد
