ممبئی، 12 نومبر (ہ س)۔ اداکار سدھارتھ ملہوترا کا خیال ہے کہ بھارتی ثقافت اور لوک کہانیوں سے جڑی فلموں کو ناظرین کی جانب سے اچھا ردعمل مل رہا ہے۔ تاہم، ریلیز سے پہلے ایسی فلموں کی کامیابی کو لے کر کئی طرح کے خدشات ظاہر کیے جاتے ہیں۔

اپنی اہلیہ کیارا اڈوانی کے ساتھ ’کافی ود کرن‘ کے آخری سیزن میں شرکت کرنے والے سدھارتھ نے اپنی فلم ’ون: فورس آف دی فاریسٹ‘ کی کارکردگی اور فلم انڈسٹری میں ایک دوسرے کے کام کی تعریف کرنے کی ضرورت پر کھل کر بات کی۔ اس شو میں پہلی بار سدھارتھ اور کیارا ایک ساتھ نظر آئے۔

گفتگو کے دوران کرن جوہر نے فلم کے باکس آفس پر ہونے والی کمائی اور اس کی کارکردگی پر اٹھنے والے سوالات کا ذکر کیا۔ اس پر سدھارتھ نے کہا کہ ناقدین اپنا کام کر رہے ہیں اور فنکار اپنا۔ ان کے مطابق، ملک میں ناظرین کا ایک بڑا طبقہ اپنی مٹی اور ثقافت سے جڑی کہانیاں دیکھنا چاہتا ہے۔ فلم ’ون‘ ناظرین کی اسی پسند پر پوری اتری ہے۔

انہوں نے مزید کہا کہ فلم کی کہانی، اداکاری اور مناظر ناظرین کو پسند آئے۔ کیارا نے بھی اس بات سے اتفاق کیا کہ فلم انڈسٹری میں ایک دوسرے کی تعریف کرنے کے بجائے خامیاں نکالنے کا رجحان زیادہ ہے۔ سدھارتھ نے کہا کہ انڈسٹری میں مثبت ماحول ہونا چاہیے اور لوگوں کو ایک دوسرے کا تعاون کرنا چاہیے۔

فلمی ناقدین کے بارے میں پوچھے جانے پر سدھارتھ نے کہا کہ ہر کسی کو اپنی رائے رکھنے کا حق ہے، لیکن فلم کا جائزہ لینے کا مطلب صرف اس کی برائی کرنا یا ناظرین کو سینما گھروں میں جانے سے روکنا نہیں ہونا چاہیے۔

’ون: فورس آف دی فاریسٹ‘ بہار کے بہٹا میں واقع ون دیوی مندر کی لوک کہانی پر مبنی ہے۔ فلم میں سدھارتھ نے ممبئی کے رہنے والے رشی کا کردار ادا کیا ہے، جو اپنی اہلیہ ممتا (تمنا بھاٹیہ) کے ساتھ دیوانچل گاؤں پہنچتا ہے۔ وہاں کی قدیم روایات اور جنگل سے جڑی وارننگز کے درمیان کہانی ایک خوفناک موڑ اختیار کر لیتی ہے۔

فلم نے دنیا بھر میں 91.49 کروڑ روپے کی کمائی کی ہے اور فی الحال یہ ایمیزون پرائم ویڈیو پر دستیاب ہے۔

ہندوستھان سماچار

---------------

ہندوستھان سماچار / عبدالواحد