نئی دہلی، 8 اکتوبر (ہ س):۔

دہلی کی وزیر اعلیٰ ریکھا گپتا نے دہلی یونیورسٹی کے نارتھ کیمپس میں تاریک مقامات، روشنی کی کمی، ٹوٹے ہوئے فٹ پاتھوں اور کچرے کے مسئلے کو جلد از جلد حل کرنے کی ہدایت دی ہے۔ انہوں نے کہا کہ طالبات کی سلامتی میں کسی بھی قسم کی لاپرواہی برداشت نہیں کی جائے گی۔

وزیر اعلیٰ بدھ کی دیر رات دہلی یونیورسٹی کے نارتھ کیمپس پہنچیں، جہاں انہوں نے آرٹس فیکلٹی کے باہر طالبات سے براہِ راست گفتگو کی اور ان سے سلامتی، نقل و حمل، ہاسٹل اور کالج سے متعلق مسائل کے بارے میں معلومات حاصل کیں۔ انہوں نے طالبات سے پوچھا کہ آیا رات کے وقت آمد و رفت میں کسی قسم کی دشواری یا عدم تحفظ کا احساس ہوتا ہے اور اگر کالج سے متعلق کوئی مسئلہ ہو تو اس سے بھی آگاہ کریں۔

معائنے کے دوران وزیر اعلیٰ نے کیمپس میں کئی تاریک مقامات کا جائزہ لیا اور متعلقہ افسران سے موقع پر ہی تفصیلات طلب کیں۔ انہوں نے کہا کہ سڑکوں پر مناسب روشنی کے باوجود کیمپس کے کئی حصوں میں اندھیرا ہے، جبکہ یہاں طلبہ و طالبات کی مسلسل آمد و رفت رہتی ہے۔ افسران کو ہدایت دی گئی کہ ایسے تمام مقامات کی نشاندہی کرکے وہاں مناسب روشنی کا انتظام کیا جائے۔ درختوں کی غیر ضروری شاخوں کی کٹائی اور اضافی لائٹس نصب کرنے کے بھی احکامات دیے گئے۔

وزیر اعلیٰ نے ٹوٹے اور غیر ہموار فٹ پاتھوں پر ناراضی ظاہر کرتے ہوئے کہا کہ ان کی وجہ سے طلبہ کو چلنے میں دشواری نہیں ہونی چاہیے۔ انہوں نے خصوصی طور پر معذور طلبہ کی سہولت کا خیال رکھنے اور خراب فٹ پاتھوں کی فوری مرمت کی ہدایت دی۔

انہوں نے کیمپس میں نصب سی سی ٹی وی کیمروں کی تعداد اور ان کی فعالیت کے بارے میں بھی معلومات حاصل کیں اور کہا کہ جہاں مزید کیمروں کی ضرورت ہو وہاں جلد از جلد نصب کیے جائیں۔ انہوں نے واضح کیا کہ کیمپس کا کوئی بھی حساس علاقہ نگرانی سے باہر نہیں رہنا چاہیے۔

طالبات نے وزیر اعلیٰ کو بتایا کہ رات کے وقت خواتین پولیس اہلکار موجود رہتی ہیں اور ضرورت پڑنے پر پی سی آر بھی فوری پہنچتی ہے۔ وزیر اعلیٰ نے پولیس اور یونیورسٹی انتظامیہ کے درمیان بہتر رابطے پر زور دیا تاکہ سلامتی کے انتظامات مزید مضبوط بنائے جا سکیں۔

کیمپس میں صفائی کی خراب صورتحال اور گرین بیلٹ کی بدحالی پر بھی انہوں نے افسران سے سوالات کیے اور فوری صفائی کے احکامات جاری کیے۔ انہوں نے کہا کہ یونیورسٹی وہ مقام ہے جہاں روزانہ ہزاروں طلبہ آتے جاتے ہیں، اس لیے صفائی، روشنی، محفوظ راستے اور بہتر عوامی سہولیات کو یقینی بنانا ضروری ہے۔

ہاسٹل اور پی جی سے متعلق مسائل پر گفتگو کرتے ہوئے وزیر اعلیٰ نے کہا کہ دہلی حکومت جلد ہی پی جی پالیسی متعارف کرانے جا رہی ہے، جس کے ذریعے پی جی رہائش کے لیے ضروری اصول اور معیارات طے کیے جائیں گے۔ طلبہ کے لیے نئے ہاسٹلوں کی تعمیر اور بہتر رہائشی سہولیات کی فراہمی پر بھی کام جاری ہے۔

انہوں نے افسران کو آرٹس فیکلٹی، لاء فیکلٹی، سائنس فیکلٹی، پارکنگ اور دیگر حساس مقامات کا دوبارہ معائنہ کرنے کی ہدایت دی اور کہا کہ طالبات کی سلامتی پر کسی بھی سطح پر سمجھوتہ نہیں کیا جا سکتا۔ وزیر اعلیٰ نے طالبات کو سیلف ڈیفنس کی تربیت حاصل کرنے کی بھی تلقین کی۔

معائنے کے اختتام پر وزیر اعلیٰ نے طالبات کے ساتھ خوشگوار ماحول میں گفتگو جاری رکھی اور ان کے ساتھ چائے بھی نوش کی۔ اس موقع پر محکمہ تعمیرات عامہ، دہلی میونسپل کارپوریشن اور دہلی پولیس کے اعلیٰ افسران بھی موجود تھے۔

ہندوستھان سماچار

ہندوستان سماچار / عطاءاللہ