نئی دہلی، 7 اکتوبر(ہ س)۔ پیرا اولمپک چمپئن پر مود بھگت اور بھاوینا پٹیل 18 اکتوبر کو جاپان کے ناگویا میں ہونے والے آیچی-ناگویا 2026 ایشیائی پیرا کھیلوں کی افتتاحی تقریب میں ہندوستانی دستے کے پرچم بردار ہوں گے۔ دونوں کھلاڑی ہندوستان کے کامیاب ترین پیرا ایتھلیٹس میں شامل ہیں اور ان کی کامیابیوں نے ملک میں پیرا کھیلوں کو نئی شناخت دی ہے۔

ہندوستانی پیرا اولمپک کمیٹی کے مطابق پیرا بیڈمنٹن کھلاڑی پر مود بھگت نے 2014 سے 2023 کے درمیان ایشیائی پیرا کھیلوں میں چھ تمغے جیتے ہیں، جن میں دو سونا اور چار کانسہ کے تمغے شامل ہیں۔

دوسری جانب پیرا ٹیبل ٹینس کھلاڑی بھاوینا پٹیل نے 2018 سے 2023 کے درمیان ایشیائی پیرا کھیلوں میں دو تمغے حاصل کیے، جن میں ایک چاندی اور ایک کانسہ کا تمغہ شامل ہے۔پر مود اور بھاوینا نے مل کر ایشیائی پیرا کھیلوں میں آٹھ تمغے جیتے ہیں۔ اب دونوں 18 سے 24 اکتوبر تک ہونے والے پانچویں ایشیائی پیرا کھیلوں میں ہندوستانی دستے کے آگے ترنگا لے کر چلیں گے۔

ہندوستانی پیرا اولمپک کمیٹی 8 اکتوبر کو نئی دہلی میں خصوصی الوداعی تقریب میں ہندوستانی دستے کو باضابطہ طور پر روانہ کرے گی۔ مرکزی وزیر برائے نوجوانوں کے امور اور کھیل ڈاکٹر منسکھ منڈاویہ تقریب کے مہمان خصوصی ہوں گے، جبکہ وزیر مملکت برائے نوجوانوں کے امور و کھیل رکشا نکھل کھڈسے بطور مہمان خصوصی موجود رہیں گی۔

پر مود بھگت اور بھاوینا پٹیل کو پرچم بردار منتخب کیا جانا خاص اہمیت رکھتا ہے۔ دونوں کھلاڑی ہندوستان میں پیرا کھیلوں کی ترقی میں نمایاں کردار ادا کرتے رہے ہیں اور بڑے بین الاقوامی مقابلوں میں ملک کا نام روشن کرتے رہے ہیں۔ ہندوستانی دستے کی قیادت میں ان کی موجودگی کو عالمی پیرا کھیلوں میں ہندوستان کے بڑھتے ہوئے سفر کی علامت قرار دیا جا رہا ہے۔ہندوستانی پیرا اولمپک کمیٹی کے صدر دیویندر جھاجھریا نے کہا کہ افتتاحی تقریب میں پر مود بھگت اور بھاوینا پٹیل کو ہندوستانی دستے کی قیادت کرتے دیکھنا باعث فخر ہے۔ انہوں نے کہا کہ دونوں کھلاڑیوں نے ہندوستانی پیرا کھیلوں کی ترقی میں اہم کردار ادا کیا ہے اور ان کی جدوجہد، کامیابیاں اور عزم انہیں ہندوستانی دستے کی نمائندگی کے لیے موزوں بناتے ہیں۔

بھاوینا پٹیل نے کہا کہ ہندوستان کی پرچم بردار منتخب ہونا ان کے لیے انتہائی فخر کا لمحہ ہے۔ انہوں نے کہا کہ ترنگا ہاتھ میں لے کر چلنے سے احساس ہوتا ہے کہ وہ اپنے سے کہیں بڑی چیز کی نمائندگی کر رہی ہیں۔ انہوں نے کہا کہ وہ پر مود بھگت کے ساتھ افتتاحی تقریب میں ہندوستانی دستے کی قیادت کرنے کے لیے پُرجوش ہیں اور چاہتی ہیں کہ تمام کھلاڑی اعتماد کے ساتھ مقابلہ کریں اور ہندوستان کے لیے بہترین کارکردگی کا مظاہرہ کریں۔آیچی-ناگویا 2026 ایشیائی پیرا کھیلوں میں پورے براعظم کے پیرا کھلاڑی شرکت کریں گے۔ ہندوستان بھی بڑے بین الاقوامی مقابلوں میں اپنی کامیابیوں کے سلسلے کو آگے بڑھانے کے ہدف کے ساتھ میدان میں اترے گا۔

ہندوستھان سماچار

ہندوستان سماچار / Mohammad Khan