نئی دہلی، 7 اکتوبر(ہ س)۔

ہندوستان کے ٹی20 کپتان شریس ایئر بدھ کو جاری تازہ آئی سی سی رینکنگ میں ٹی20 بین الاقوامی بلے بازوں کی فہرست میں 18 درجے کی چھلانگ لگا کر کیریئر کی بہترین ساتویں پوزیشن پر پہنچ گئے ہیں، جبکہ ون ڈے ٹیم کے کپتان شبھمن گل 50 اوور کے فارمیٹ میں بلے بازوں کی رینکنگ میں بدستور سرفہرست ہیں۔

شریس ایئر نے منگل کو لکھنؤ میں ویسٹ انڈیز کے خلاف سیریز کے پہلے میچ میں صرف 43 گیندوں پر ناٹ آؤٹ 102 رنز کی دھواں دار اننگز کھیلی۔ ان کی اننگز میں 10 چوکے اور 6 چھکے شامل تھے۔ ان کی شاندار بلے بازی کی بدولت عالمی چمپئن ہندوستان نے یہ مقابلہ 8 وکٹ سے جیت لیا۔

آئی سی سی کے مطابق، اس اننگز کے بعد ایئر 18 درجے اوپر چڑھ کر ساتویں مقام پر پہنچ گئے اور ٹی20 بین الاقوامی میں ہندوستان کے تیسرے سب سے زیادہ رینک والے بلے باز بن گئے ہیں۔ ایشان کشن اور ابھیشیک شرما پہلے دو مقامات پر برقرار ہیں، جبکہ تلک ورما 10ویں نمبر پر ہیں۔ اس طرح ہندوستان کے چار بلے باز ٹاپ 10 میں شامل ہیں۔

نوجوان بلے باز ویبھو سوریاونشی بھی 8 درجے کی بہتری کے ساتھ 46ویں مقام پر پہنچ گئے ہیں۔ ویسٹ انڈیز کے شرفین ردرفورڈ 56 رنز کی تیز رفتار اننگز کھیلنے کے بعد 10 درجے اوپر چڑھ کر 37ویں مقام پر پہنچ گئے ہیں۔ ایشیائی کھیلوں میں شاندار کارکردگی کے بعد پاکستان کے حسن نواز نے بھی 62 درجے کی بڑی چھلانگ لگائی اور اب وہ 48ویں نمبر پر ہیں۔

گیند بازوں کی رینکنگ میں افغانستان کے لیگ اسپنر راشد خان نے دوبارہ ٹی20 بین الاقوامی گیند بازوں کی فہرست میں سرفہرست مقام حاصل کر لیا ہے۔ یہ آٹھواں موقع ہے جب راشد خان نمبر ایک بنے ہیں۔ وہ کسی بھی دوسرے گیند باز کے مقابلے میں دوگنے سے زیادہ عرصے تک عالمی نمبر ایک رہ چکے ہیں۔ایشیائی کھیلوں کے سیمی فائنل اور فائنل میں بالترتیب 29 رنز دے کر کوئی وکٹ اور 29 رنز دے کر ایک وکٹ حاصل کرنے والے پاکستان کے ابرار احمد اپنا سرفہرست مقام برقرار نہیں رکھ سکے۔

ہندوستان کے بائیں ہاتھ کے اسپنر اکشر پٹیل نے گزشتہ ہفتے تین میچوں میں دو، دو وکٹیں حاصل کیں۔ اس کارکردگی کے بعد وہ 16 درجے اوپر چڑھ کر ساتویں مقام پر پہنچ گئے ہیں۔

شبھمن گل نے گوہاٹی میں ویسٹ انڈیز کے خلاف دوسرے ون ڈے میں ناٹ آؤٹ 223 رنز کی تاریخی اننگز کھیلنے کے بعد ون ڈے بلے بازوں کی رینکنگ میں اپنی پہلی پوزیشن مزید مضبوط کر لی ہے۔اس فارمیٹ میں گل کا یہ دوسرا ڈبل سنچری تھا اور ون ڈے کرکٹ میں ہدف کا تعاقب کرتے ہوئے یہ سب سے بڑا انفرادی اسکور بھی ہے۔ اس اننگز کی بدولت گل کو 25 ریٹنگ پوائنٹس حاصل ہوئے اور وہ اپنے کیریئر کے بہترین 841 ریٹنگ پوائنٹس کی برابری پر پہنچ گئے۔ہندوستان کے سابق کپتان وراٹ کوہلی ایک مقام کھسک کر دوسرے سے تیسرے نمبر پر آ گئے ہیں۔

کے ایل راہل نے بھی 7 درجے کی چھلانگ لگا کر ٹاپ 10 میں واپسی کی ہے۔ ویسٹ انڈیز کے خلاف تیسرے ون ڈے میں شاندار سنچری بنانے کے بعد راہل اب 10ویں مقام پر پہنچ گئے ہیں۔

ہندوستھان سماچار

ہندوستان سماچار / Mohammad Khan