علی گڑھ, 07 اکتوبر (ہ س)۔

علی گڑھ مسلم یونیورسٹی کے شعبہ لائبریری و انفارمیشن سائنس نے ‘اکیسویں صدی کی لائبریرین شپ کے لیے درکار انسانی مہارتیں’ موضوع پر ایک ورکشاپ منعقد کی، جس میں بدلتے ہوئے لائبریری پیشے میں انسانوں پر مرکوز صلاحیتوں کی اہمیت کو اجاگر کیا گیا۔

ورکشاپ کے دو سیشن بی لِب آئی ایس سی، ایم لِب آئی ایس سی کے طلبہ اور ریسرچ اسکالرز کے لئے منعقد کئے گئے۔ صدر شعبہ پروفیسر مہتاب عالم انصاری نے کہا کہ لائبریرین کے لیے تکنیکی اور ڈیجیٹل صلاحیتوں کے ساتھ ساتھ ابلاغ، باہمی روابط، حالات کے مطابق خود کو ڈھالنے، ٹیم ورک اور قیادت کی مہارتیں بھی ضروری ہیں۔

ریسورس پرسن محترمہ پونم بھارتی گولا، لائبریرین، آل انڈیا مینجمنٹ ایسوسی ایشن، نئی دہلی نے جدید لائبریرین شپ میں ابلاغ، جذباتی ذہانت، باہمی تعاون، تنقیدی فکر، حالات کے مطابق خود کو ڈھالنے اور قیادت کی اہمیت پر گفتگو کی۔ انہوں نے تیزی سے بڑھتے ہوئے ڈیجیٹل ماحول میں ان مہارتوں کی معنویت پر بھی روشنی ڈالی۔ محترمہ گولا کو 2022 میں جین لوری لیڈرشپ ڈیولپمنٹ گرانٹ اور 2025 میں یونیورسٹی کالج لندن میں میٹا سائنس کے لیے فوکس ویگن فاؤنڈیشن گرانٹ سے نوازا جا چکا ہے۔

ورکشاپ کے کوآرڈینیٹر پروفیسر نوشاد علی پی ایم نے کلماتِ تشکر ادا کیے اور محققین کے لیے بالخصوص ابلاغ، باہمی تعاون، روابط استوار کرنے، ٹیم ورک اور مختلف علمی کمیونٹیز کے ساتھ بامعنی تعامل کی اہمیت واضح کی۔ شعبہ کی جونیئر ریسرچ فیلو مس اذکا شہزاد نے پروگرام کے انعقاد میں تعاون کیا۔

---------------

ہندوستان سماچار / سید کامران علی گڑھ