ممبئی، 30 اکتوبر (ہ س)۔ ہارر فلموں میں خوف کے ساتھ تجسس اور پراسراریت کا ہونا بھی ضروری ہے۔ ہدایت کار راجن رام گوپال ورما کی فلم ’جھاڑ پھونک‘ انہی عناصر کو یکجا کرکے ناظرین کو خوف اور بے یقینی کی دنیا میں لے جانے کی کوشش کرتی ہے۔ اتراکھنڈ کی پہاڑیوں کے پس منظر میں بنی اس فلم میں یشپال شرما کا پراسرار انداز اور سنبل توقیر خان کی جذبات سے بھرپور اداکاری خاص طور پر توجہ کھینچتی ہے۔ توہم پرستی، بھوت پریت اور ایک حاملہ خاتون کی جدوجہد پر مبنی اس فلم میں راز کی پرتیں آہستہ آہستہ کھلتی ہیں۔

کہانی

فلم کی شروعات اتراکھنڈ کی پہاڑیوں میں سفر کرنے والے آستھا (سنبل توقیر خان) اور راج ویر (ہرش راجپوت) سے ہوتی ہے۔ آستھا حاملہ ہے اور راج ویر سے ناراض ہے، کیونکہ اس نے ابھی تک اپنے گھر والوں کو ان کی شادی کے بارے میں نہیں بتایا ہے۔

سفر کے دوران اچانک ان کی گاڑی کے سامنے ایک پراسرار عورت آ جاتی ہے۔ اسے بچانے کی کوشش میں گاڑی حادثے کا شکار ہو جاتی ہے اور دونوں زخمی ہو جاتے ہیں۔ ہوش آنے پر آستھا خود کو ایک اجنبی گھر میں پاتی ہے، جہاں موہن ٹھاکر (یشپال شرما) اور ان کی بیوی کامنی (پدمنی کولہاپورے) اس کی دیکھ بھال کر رہے ہوتے ہیں۔

آستھا جب راج ویر کے بارے میں پوچھتی ہے تو اسے بتایا جاتا ہے کہ حادثے کے وقت وہ گاڑی میں اکیلی تھی۔ یہ سن کر وہ حیران اور پریشان رہ جاتی ہے۔

کچھ وقت گزرنے کے بعد اس گھر میں عجیب و غریب واقعات پیش آنے لگتے ہیں۔ انجان آہٹیں اور پراسرار تجربات آستھا کے خوف میں مزید اضافہ کر دیتے ہیں۔ جب وہ موہن اور کامنی سے ان واقعات کے بارے میں پوچھتی ہے تو وہ اسے منجری نامی ایک عورت کی کہانی سناتے ہیں۔

ان کے مطابق کئی سال پہلے گاؤں والوں نے منجری کو اس کے پیٹ میں پلنے والی بچی سمیت قتل کر دیا تھا۔ کہا جاتا ہے کہ مرنے سے پہلے منجری نے قسم کھائی تھی کہ وہ اس گاؤں میں کسی بچے کو پیدا نہیں ہونے دے گی۔

اب آستھا کو محسوس ہونے لگتا ہے کہ وہ بھی اس پراسرار معاملے میں پھنس چکی ہے۔ کیا وہ اس گھر سے نکل پائے گی؟ راج ویر کہاں ہے اور اس کے ہونے والے بچے کا کیا ہوگا؟ انہی سوالوں کے سہارے فلم کی کہانی آگے بڑھتی ہے۔

اداکاری

یشپال شرما فلم کی سب سے بڑی خوبیوں میں سے ایک ہیں۔ موہن ٹھاکر کے کردار میں انہوں نے سنجیدگی اور پراسراریت کا عمدہ امتزاج پیش کیا ہے۔ ان کے چہرے کے تاثرات، مکالموں کی ادائیگی اور نپی تلی اداکاری کردار کو دلچسپ بناتی ہے۔ کئی مناظر میں ان کی محض موجودگی ہی کہانی میں خوف اور تناؤ بڑھانے کے لیے کافی ثابت ہوتی ہے۔

سنبل توقیر خان نے آستھا کے کردار میں اچھی اداکاری کی ہے۔ حادثے کے بعد ایک اجنبی جگہ پر پھنس جانے اور اپنے ہونے والے بچے کی فکر میں مبتلا آستھا خوف، بے چینی اور عدم تحفظ کے احساس سے گزرتی ہے۔ سنبل نے ان جذبات کو نہایت فطری انداز میں پیش کیا ہے۔ خاص طور پر تناؤ سے بھرپور مناظر میں ان کی اداکاری متاثر کن ہے۔

پدمنی کولہاپورے نے کامنی کے کردار میں اپنی تجربہ کار اداکاری سے کہانی کو سنجیدگی بخشی ہے۔ دوسری جانب ہرش راجپوت نے کم مناظر ملنے کے باوجود راج ویر کے کردار میں اپنی چھاپ چھوڑی ہے۔ دیگر فنکاروں نے بھی کہانی کی پراسرار فضا برقرار رکھنے میں اپنا کردار ادا کیا ہے۔

ہدایت کاری اور تکنیکی پہلو

راجن رام گوپال ورما نے کہانی کے راز کو آہستہ آہستہ کھولنے کی کوشش کی ہے۔ حادثہ، اجنبی گھر، لاپتہ ساتھی اور منجری کے ماضی سے جڑے سوالات ناظرین کی دلچسپی برقرار رکھتے ہیں۔

فلم کا ویران اور تنہا ماحول اور اتراکھنڈ کی پہاڑیاں کہانی کے مزاج سے پوری طرح مطابقت رکھتی ہیں۔ ہارر فلموں میں خاموشی، آوازوں اور ماحول کی خاص اہمیت ہوتی ہے۔ ’جھاڑ پھونک‘ میں ان عناصر کو خوف اور سنسنی پیدا کرنے کے لیے استعمال کیا گیا ہے۔

پس منظر کی موسیقی اور ساؤنڈ ڈیزائن پراسرار مناظر کے اثر کو مزید گہرا کرتے ہیں۔ اگرچہ بعض مناظر کو زیادہ چست اور بہتر انداز میں فلمایا جا سکتا تھا، لیکن مجموعی طور پر فلم کے تکنیکی پہلو کہانی کی خوفناک فضا کو برقرار رکھنے میں مدد دیتے ہیں۔

حتمی رائے

’جھاڑ پھونک‘ ایک ایسی فلم ہے جس میں خوف، توہم پرستی اور پراسرار واقعات کو یکجا کیا گیا ہے۔ اس کی کہانی ایک حاملہ خاتون کے گرد گھومتی ہے، جو حادثے کے بعد ایک ایسی جگہ پہنچ جاتی ہے جہاں ہر واقعہ اس کے سامنے ایک نیا سوال کھڑا کر دیتا ہے۔

یشپال شرما کی پراسرار اداکاری اور سنبل توقیر خان کی جاندار پرفارمنس فلم کو مضبوط بناتی ہے۔ پدمنی کولہاپورے اور ہرش راجپوت نے بھی اپنے کردار بخوبی نبھائے ہیں۔

فلم میں خوف اور تجسس کی فضا کافی حد تک برقرار رہتی ہے، اگرچہ بعض حصوں میں کہانی کو مزید مؤثر انداز میں پیش کیا جا سکتا تھا۔ اگر آپ کو بھوت پریت، توہم پرستی اور سسپنس سے بھرپور کہانیاں پسند ہیں تو ’جھاڑ پھونک‘ آپ کے لیے ایک اچھا انتخاب ثابت ہو سکتی ہے۔

فلم کی تفصیلات

فلم: جھاڑ پھونک

اداکار: یشپال شرما، پدمنی کولہاپورے، سنبل توقیر خان، ہرش راجپوت، اپرتیم سنگھ

ہدایت کار: راجن رام گوپال ورما

پروڈیوسر: شیلیش پریہار

شریک پروڈیوسر: ورندا برہم بھٹ

صنف: ہارر (خوفناک فلم)

پلیٹ فارم: جیو ہاٹ اسٹار

ریٹنگ: ★★★½ (3.5/5)

ہندوستھان سماچار

---------------

ہندوستھان سماچار / عبدالسلام صدیقی