ممبئی، 30 اکتوبر (ہ س)۔ جس ’رامائن‘ کی جڑیں ہندوستانی سرزمین میں پیوست ہیں اور جس کی کہانی ملک کے کروڑوں لوگوں کے عقیدے سے جڑی ہوئی ہے، اسی فلم کے حوالے سے ہندوستانی شائقین اور صحافیوں سے براہ راست بات چیت کو ترجیح نہیں دی جا رہی ہے۔

ہندوستانی رزمیہ داستان ’رامائن‘ کو غیر ملکی ناظرین کے سامنے شاندار انداز میں پیش کرنا اچھی بات ہے، لیکن کیا بین الاقوامی شناخت کی دوڑ میں اپنے ملک کے شائقین کو نظر انداز کرنا درست حکمت عملی ہے؟ آخر جس ہندوستانی شائقین کے بھروسے اس فلم کی سب سے بڑی تجارتی امیدیں وابستہ ہیں، انہیں فلم کے فنکاروں اور پروڈیوسروں سے بات چیت کا مناسب موقع کیوں نہیں ملنا چاہیے؟ صرف غیر ملکی پلیٹ فارموں پر شاندار تقریبات منعقد کرنے سے ہندوستانی شائقین کے درمیان فلم کے تئیں تجسس پیدا نہیں کیا جا سکتا۔

ہندوستانی ثقافت، عقیدے اور روایت سے جڑی ’رامائن‘ کو بڑے پردے پر پیش کرنے کی تیاری کر رہے پروڈیوسر نمت ملہوترا کی پوری توجہ فلم کو عالمی شناخت دلانے پر نظر آ رہی ہے۔ نتیش تیواری کی ہدایت کاری میں بننے والی اور رنبیر کپور، سائی پلوی اور یش کی اداکاری سے مزین فلم ’رامائن‘ کی تشہیر کے لیے غیر ملکی پلیٹ فارموں کو ترجیح دی جا رہی ہے۔

27 اکتوبر کو لاس اینجلس کے معروف ڈیوڈ گیفن تھیٹر میں فلم کا شاندار پریمیئر منعقد کیا گیا، جس میں فلم کے اداکاروں، ہدایت کار اور پروڈیوسر نے شرکت کی۔ غیر ملکی میڈیا اور ہالی ووڈ کی شخصیات کے درمیان فلم کی زبردست تشہیر کی گئی، لیکن اس پوری سرگرمی میں ہندوستانی میڈیا کے کردار اور اسے ملنے والے مواقع کے حوالے سے سوالات اٹھنے لگے ہیں۔

رنبیر کپور، سائی پلوی اور یش جیسے بڑے ستاروں سے ہندوستانی میڈیا بھی فلم کی تیاری، کرداروں کی تفہیم اور ’رامائن‘ جیسے حساس رزمیہ کو پردے پر پیش کرنے کی ذمہ داری کے بارے میں سوالات کرنا چاہتا ہے۔ لیکن اگر تشہیری سرگرمیوں میں غیر ملکی صحافیوں کو ترجیح دی جاتی ہے اور ہندوستانی صحافیوں کے لیے مناسب مواقع نہیں رکھے جاتے تو یہ یقیناً مایوس کن ہے۔ نمت ملہوترا کو سمجھنا ہوگا کہ ہندوستانی میڈیا صرف فلم کے پوسٹر اور تشہیری مواد شائع کرنے کے لیے نہیں ہے، بلکہ وہ شائقین اور فلم سازوں کے درمیان ایک اہم ذریعہ بھی ہے۔ ایسے میں ہندوستانی صحافیوں سے دوری اختیار کرکے عالمی شناخت حاصل کرنے کی کوشش ادھوری ہی سمجھی جائے گی۔

اس کے علاوہ یہ بھی چرچا ہے کہ ہندوستان میں فلم کی خصوصی اسکریننگ کے حوالے سے ابھی تک کوئی واضح منصوبہ سامنے نہیں آیا ہے، حالانکہ اس کی سرکاری طور پر تصدیق نہیں ہوئی ہے۔ ایسے میں فلم میکرز کو واضح کرنا چاہیے کہ آیا ہندوستانی میڈیا اور فلمی دنیا کے لیے خصوصی اسکریننگ کا اہتمام کیا جائے گا یا نہیں۔

آخرکار ’رامائن‘ ہندوستان کا ثقافتی ورثہ ہے اور اسے سب سے پہلے ہندوستانی شائقین کے سامنے اپنی ساکھ ثابت کرنی ہوگی۔ غیر ملکی ستائش اور ہالی ووڈ کا پلیٹ فارم اپنی جگہ، لیکن ہندوستانی شائقین اور میڈیا کو مناسب اہمیت دیے بغیر اس رزمیہ داستان کو عالمی شناخت دلانے کی کوشش کتنی کامیاب ہوگی؟ نمت ملہوترا کو یہ نہیں بھولنا چاہیے کہ فلم کا اصل امتحان ہندوستانی شائقین کے درمیان ہی ہونا ہے۔

ہندوستھان سماچار

ہندوستھان سماچار / محمد شہزاد