نئی دہلی، 3 اکتوبر (ہ س): ۔

مرکزی وزیر زراعت و کسان بہبود اور دیہی ترقی شیوراج سنگھ چوہان نے کانگریس پر آئینی اداروں اور عوامی مینڈیٹ کو بدنام کرنے کا الزام لگایا ہے۔ انہوں نے کہا کہ جب انتخابات میں عوام کانگریس کو مسترد کرتے ہیں تو پارٹی الیکشن کمیشن، ای وی ایم اور جمہوری نظام پر سوال اٹھانے لگتی ہے۔

چوہان نے ہفتہ کو جاری ایک بیان میں کہا کہ کانگریس صدر ملکارجن کھرگے کی جانب سے وزیر اعظم اور وزیر داخلہ کو ’غیر قانونی‘ قرار دینا آئینی اداروں اور عوامی مینڈیٹ کی توہین ہے۔ انہوں نے کہا کہ یہ بیان کانگریس کی مایوسی اور آئینی اداروں پر حملہ کرنے کی اس کی پرانی سیاست کا ثبوت ہے۔

انہوں نے کہا کہ وزیر اعظم کو ملک کے عوام نے جمہوری عمل کے تحت منتخب کیا ہے۔ ایسے میں انہیں ’غیر قانونی‘ قرار دینا جمہوری نظام کی توہین ہے۔ چوہان نے سوال اٹھایا کہ کیا کانگریس کے لیے جمہوریت اسی وقت جائز ہے جب گاندھی خاندان یا کانگریس اقتدار میں ہو؟

مرکزی وزیر نے الیکشن کمشنروں کی تقرری کے عمل کو لے کر بھی کانگریس کو نشانہ بنایا۔ انہوں نے کہا کہ چیف الیکشن کمشنر اور دیگر الیکشن کمشنروں کی تقرری سے متعلق ایکٹ، 2023 پارلیمنٹ کے دونوں ایوانوں سے منظور ہو چکا ہے اور اس میں قائد حزب اختلاف کو سلیکشن کمیٹی کا حصہ بنایا گیا ہے۔ چوہان کے مطابق اس سے اپوزیشن کی شمولیت یقینی ہوتی ہے۔

ای وی ایم کے حوالے سے چوہان نے کہا کہ جب کانگریس کرناٹک، تلنگانہ یا ہماچل پردیش میں انتخابات جیتتی ہے تو اسے ای وی ایم پر کوئی اعتراض نہیں ہوتا، لیکن شکست کے بعد ای وی ایم کو ذمہ دار ٹھہرایا جاتا ہے۔ انہوں نے کہا کہ کانگریس ملک کو بوتھ کیپچرنگ، بیلٹ باکس لوٹنے اور انتخابی تشدد کے پرانے دور میں واپس لے جانا چاہتی ہے۔

انہوں نے الزام لگایا کہ انتخابی شکست سے توجہ ہٹانے کے لیے کانگریس آئینی اداروں پر حملہ کر رہی ہے اور جمہوری نظام کو بدنام کر رہی ہے۔ چوہان نے کہا کہ بی جے پی آئین اور جمہوری عمل پر یقین رکھتی ہے اور عوام ایسے بیانات کا جواب جمہوری طریقے سے دیتے رہیں گے۔

ہندوستھان سماچار

ہندوستان سماچار / عطاءاللہ