نئی دہلی، 3 اکتوبر (ہ س):۔
قومی انسانی حقوق کمیشن (این ایچ آر سی) نے ممبئی کے شیواجی پارک میں 2 اکتوبر کو ’کاکروچ جنتا پارٹی‘ (سی جے پی) کے احتجاجی مظاہرے کے دوران نابالغ بچوں کے مبینہ استعمال کے معاملے کا سخت نوٹس لیا ہے۔ کمیشن نے اس معاملے میں مہاراشٹر حکومت اور دیگر متعلقہ محکموں کو نوٹس جاری کرتے ہوئے ایک ہفتے کے اندر ایکشن ٹیکن رپورٹ طلب کی ہے۔
قومی انسانی حقوق کمیشن کے رکن پریانک قانون گو نے ہفتہ کو ہندوستھان سماچار کو بتایا کہ کمیشن کو ممبئی میں ایک مبینہ غیر قانونی احتجاج کے دوران بچوں کو آگے کر کے پولیس یا انتظامی کارروائی سے بچنے کی سازش سے متعلق شکایت موصول ہوئی ہے۔
قانون گو کے مطابق شکایت میں ابھیجیت دیپکے، سورَبھ داس اور اجنکیا شندے کے خلاف الزامات عائد کیے گئے ہیں۔ انہوں نے بتایا کہ کمیشن نے شکایت کی جانچ کے بعد کہا کہ شکایت کنندہ کی جانب سے واٹس ایپ گروپ میں مبینہ سازش سے متعلق کافی شواہد پیش کیے گئے ہیں۔
کمیشن کے رکن نے کہا کہ بچوں کو کسی بھی غیر قانونی سرگرمی میں استعمال کرنا قانون کے تحت ایک سنگین معاملہ ہے۔ انہوں نے جوینائل جسٹس ایکٹ کی متعلقہ دفعات کا حوالہ دیتے ہوئے ممبئی پولیس کمشنر کو مناسب دفعات کے تحت مقدمہ درج کرکے کارروائی کرنے کی ہدایت دی ہے۔
ہندوستھان سماچار
ہندوستان سماچار / عطاءاللہ
03 Oct 2026
