ممبئی، 3 اکتوبر (ہ س)۔ اجے دیوگن کی انتہائی متوقع فلم ’دریشیم 3: دی کنکلوزن‘ نے 2 اکتوبر کو سینما گھروں میں ریلیز ہوتے ہی باکس آفس پر زبردست آغاز کیا ہے۔ وجے سالگاونکر اور اس کے کنبے کی کہانی کو آگے بڑھانے والی اس فلم نے پہلے ہی دن دنیا بھر میں تقریباً 95.10 کروڑ روپے کا کاروبار کیا۔ ہندوستان میں فلم کا گراس کلیکشن تقریباً 80.10 کروڑ روپے رہا، جبکہ بیرون ملک سے فلم نے تقریباً 15 کروڑ روپے کمائے۔

اس شاندار کارکردگی کے ساتھ ’دریشیم 3‘ اجے دیوگن کے کریئر کی سب سے بڑی اوپننگ کرنے والی فلم بن گئی ہے۔ اس نے ’سنگھم اگین‘ کے 43.70 کروڑ، ’سنگھم ریٹرنز‘ کے 32.09 کروڑ اور ’گول مال اگین‘ کے 30.14 کروڑ روپے کے پہلے دن کے کلیکشن کو پیچھے چھوڑ دیا ہے۔ فلم نے اس فرنچائزی کی گزشتہ دونوں فلموں کو بھی بہت پیچھے چھوڑ دیا ہے۔ 2022 میں ریلیز ہوئی ’دریشیم 2‘ نے پہلے دن 15.38 کروڑ روپے، جبکہ 2015 میں ریلیز ہوئی ’دریشیم‘ نے 5.85 کروڑ روپے کا کلیکشن کیا تھا۔

فلم کی مضبوط شروعات میں ایڈوانس بکنگ کا بھی اہم کردار رہا۔ ریلیز سے قبل بلاک سیٹوں کو شامل کرتے ہوئے ’دریشیم 3‘ کی ایڈوانس بکنگ تقریباً 79.71 کروڑ روپے تک پہنچ گئی تھی، جبکہ بلاک سیٹوں کو نکالنے کے بعد یہ رقم 67.79 کروڑ روپے رہی۔ پہلے دن 95 کروڑ روپے سے زیادہ کا عالمی کاروبار کرنے کے بعد فلم اب اپنی فرنچائزی کی پہلی فلم کے لائف ٹائم کلیکشن کو پیچھے چھوڑنے کی جانب بڑھ رہی ہے۔ 2015 میں ریلیز ہوئی ’دریشیم‘ نے دنیا بھر میں تقریباً 110.40 کروڑ روپے کا کاروبار کیا تھا۔

ہندوستھان سماچار

ہندوستان سماچار / محمد شہزاد