علی گڑھ ، 03 اکتوبر (ہ س) ۔

علی گڑھ مسلم یونیورسٹی کے طلبہ اور ایک ساتھی فاؤنڈیشن کی جانب سے آرٹس فیکلٹی لاونج میں خون عطیہ کیمپ کا انعقاد کیا گیا۔ کیمپ کا افتتاح اے ایم یو کے رجسٹرار پروفیسر عاصم ظفر نے کیا۔ اس موقع پر آرٹس فیکلٹی کے ڈین پروفیسر محمد رضوان خان، سابق ایگزیکٹو کونسل رکن پروفیسر شمیم اور لائبریری اینڈ انفارمیشن سائنس کے چیئرمین پروفیسر مہتاب سمیت متعدد اساتذہ اور طلبہ موجود رہے۔

کیمپ کے منتظم اور طلبہ لیڈر انضمام الحق نے کہا کہ پروگرام کا مقصد طلبہ کو سماجی خدمت اور انسانیت کی مدد کے لیے بیدار کرنا ہے۔ انہوں نے کہا کہ خون کا ایک یونٹ کسی ضرورت مند کی زندگی بچانے میں اہم کردار ادا کرسکتا ہے اور خون عطیہ کرنا انسانیت کی خدمت کا بہترین ذریعہ ہے۔

انہوں نے کہا کہ علی گڑھ مسلم یونیورسٹی کے بانی سر سید احمد خان نے بھی سماجی خدمت اور انسانیت کی بھلائی کا پیغام دیا تھا۔ طلبہ کی جانب سے خون عطیہ کیمپ کا انعقاد اسی پیغام کو آگے بڑھانے کی ایک کوشش ہے۔ انہوں نے کہا کہ طلبہ کا اس طرح کے فلاحی پروگراموں میں بڑھ چڑھ کر حصہ لینا قابل تحسین ہے اور اس سے دیگر طلبہ کو بھی سماجی خدمت کے لیے آگے آنے کی ترغیب ملتی ہے۔

اس موقع پر رجسٹرار پروفیسر عاصم ظفر نے کیمپ کے منتظمین کو مبارکباد پیش کرتے ہوئے ان کی کوششوں کو سراہا۔ انہوں نے کہا کہ ایسے پروگرام نہ صرف خون کی ضرورت رکھنے والے افراد کی مدد کرتے ہیں بلکہ معاشرے میں خدمت اور ذمہ داری کا جذبہ بھی پیدا کرتے ہیں۔ انہوں نے طلبہ کو سماجی اور فلاحی سرگرمیوں میں حصہ لینے کی ترغیب دیتے ہوئے کہا کہ یونیورسٹی کے طلبہ معاشرے میں مثبت تبدیلی لانے میں اہم کردار ادا کرسکتے ہیں۔

پروفیسر عاصم ظفر نے پروگرام کے منتظم انضمام الحق اور دیگر طلبہ کی کاوشوں کی تعریف کرتے ہوئے کہا کہ طلبہ کی جانب سے انسانیت کی خدمت کے لیے اس طرح کی پہل قابل ستائش ہے۔ انہوں نے امید ظاہر کی کہ مستقبل میں بھی طلبہ اسی جذبے کے ساتھ فلاحی اور سماجی خدمت کے پروگرام منعقد کرتے رہیں گے۔

کیمپ کے دوران طلبہ اور دیگر شرکاء نے خون عطیہ کیا۔ منتظمین نے شرکاء کا شکریہ ادا کرتے ہوئے کہا کہ خون کا عطیہ ایک ایسی انسانی خدمت ہے جس کا براہ راست فائدہ ضرورت مند مریضوں کو پہنچتا ہے۔

---------------

ہندوستان سماچار / سید کامران علی گڑھ