ممبئی، 29 اکتوبر (ہ س): اداکار منوج باجپئی نے بالی ووڈ کے کام کرنے کے طریقے اور فلم انڈسٹری میں اپنی شناخت کے حوالے سے کھل کر اپنی رائے کا اظہار کیا ہے۔ طویل عرصے سے فلمی دنیا میں سرگرم رہنے کے باوجود منوج آج بھی خود کو بالی ووڈ کا حصہ محسوس نہیں کرتے۔ انہوں نے کہا، ’’میں فلم انڈسٹری کا حصہ ہوں، اس کے باوجود مجھے ایسا نہیں لگتا کہ میں یہاں کا ہوں۔‘‘

اداکار کے مطابق فلم انڈسٹری کو ایک خاندان کے طور پر پیش کرنا حقیقت سے دور ہے۔ یہاں صلاحیت اور محنت کے ساتھ ساتھ جان پہچان بھی اہمیت رکھتی ہے، جبکہ فنکاروں کے درمیان ایک دوسرے کی کامیابی کا جشن منانے کا جذبہ کم ہی نظر آتا ہے۔

منوج کا ماننا ہے کہ کسی بھی فنکار کی اصل پہچان اس کے کام اور صلاحیت سے بنتی ہے۔ ان کے لیے ذاتی تعلقات اور لوگوں کی تعریف سے زیادہ اہم اپنے کام کے تئیں ایماندار رہنا ہے۔ اداکار کا کہنا ہے کہ فنکار کو اپنی فنکاری پر توجہ دینی چاہیے اور مسلسل بہتر کام کرنے کی کوشش کرنی چاہیے۔

ان کے مطابق کسی بھی شعبے میں طویل عرصے تک قائم رہنے کے لیے اپنے ہنر سے لگاؤ اور کام کا معیار سب سے زیادہ اہم ہوتا ہے۔

ان دنوں منوج باجپئی نیٹ فلکس کی ویب سیریز ’غضب رات‘ میں نظر آ رہے ہیں۔ اپنے فلمی کیریئر میں انہوں نے مختلف نوعیت کے کردار ادا کرکے اداکاری میں اپنی الگ شناخت بنائی ہے۔ بالی ووڈ میں گروپ بندی اور باہمی تعلقات کے حوالے سے ان کے بے باک بیانات ایک بار پھر موضوعِ بحث بن گئے ہیں۔

منوج کی باتوں سے واضح ہے کہ وہ فلم انڈسٹری میں اپنی جگہ تعلقات یا تعریفوں کے بجائے اپنے کام کی بنیاد پر برقرار رکھنا چاہتے ہیں۔

ہندوستھان سماچار

---------------

ہندوستھان سماچار / عبدالسلام صدیقی