ممبئی، 27 اکتوبر (ہ س): دھنوش اور ممّوٹی کی اداکاری سے سجی فلم ’اوم: چیپٹر 1‘ کو لے کر ناظرین کا تجسس مسلسل بڑھتا جا رہا ہے۔ اسی دوران فلم کے سازوں نے سائی پلوی کے کردار آئی پی ایس نتیا ریڈی کا نیا ٹیزر جاری کیا ہے۔
اس ٹیزر میں اداکارہ خاکی وردی میں ایک پُراثر انداز میں نظر آ رہی ہیں۔ ایکشن تھرلر فلم میں ان کا کردار کہانی کو کس سمت لے جائے گا، اس کا انکشاف فی الحال نہیں کیا گیا ہے۔ اپنی فطری اداکاری اور مؤثر پرفارمنس کے لیے پہچانی جانے والی سائی پلوی اس فلم میں پہلی بار ایک پولیس افسر کے کردار میں دکھائی دیں گی۔
آئی پی ایس نتیا ریڈی کے روپ میں ان کا انداز ان کے سابقہ کرداروں سے مختلف ہے۔ ٹیزر میں ان کی شخصیت کی ایک جھلک پیش کی گئی ہے، لیکن کہانی میں ان کے کردار اور دیگر کرداروں کے ساتھ ان کے تعلقات کے حوالے سے راز برقرار رکھا گیا ہے۔ ان کے اس نئے روپ نے فلم کے تئیں ناظرین کی دلچسپی مزید بڑھا دی ہے۔
آرٹیک اسٹوڈیوز کی پروڈیوسر شردھا اگروال نے سائی پلوی کو فلم کا ایک اہم حصہ قرار دیتے ہوئے کہا کہ ان کی اداکاری میں ایمانداری اور فطری پن نمایاں ہے۔ انہوں نے اعتماد ظاہر کیا کہ اداکارہ اس کردار کے ساتھ مکمل انصاف کریں گی۔
راج کمار پیریاسامی کی ہدایت کاری میں بننے والی فلم ’اوم: چیپٹر 1‘ میں دھنوش، ممّوٹی اور سائی پلوی کے علاوہ سری لیلا اور نصیرالدین شاہ بھی اہم کرداروں میں نظر آئیں گے۔
آرٹیک اسٹوڈیوز اور ونڈربار فلمز کے بینر تلے بننے والی یہ فلم 20 نومبر 2026 کو دنیا بھر کے سنیما گھروں میں ریلیز ہوگی۔
ہندوستھان سماچار
---------------
ہندوستھان سماچار / عبدالواحد
