ممبئی، 24 اکتوبر (ہ س)۔ رنبیر کپور اور سائی پلوی کی اداکاری سے والی فلم ’رامائن‘ کے پہلے پارٹ کی ریلیز سے قبل ہی اس کے دوسرے پارٹ کے حوالے سے نئی معلومات سامنے آئی ہیں۔ اطلاعات کے مطابق، نتیش تیواری کی ہدایت کاری میں بننے والی فلم ’رامائن 2‘ کی ریلیز 2027 کی دیوالی سے آگے بڑھا کر 2028 تک ملتوی کی جا سکتی ہے۔
فلم کے پروڈیوسر نمیت ملہوترا دوسرے پارٹ کی تیاری کے لیے مزید وقت دینا چاہتے ہیں، تاکہ شائقین کو بڑے پردے پر ایک شاندار سنیما تجربہ فراہم کیا جا سکے۔ تاہم، فلم میکرز نے ابھی تک ریلیز کی تاریخ میں تبدیلی کے بارے میں کوئی باضابطہ اعلان نہیں کیا ہے۔
فلم سے وابستہ ایک ذریعے کے مطابق، نمیت ملہوترا کے لیے ’رامائن‘ محض ایک فلم نہیں، بلکہ جذباتی وابستگی رکھنے والا ایک اہم پروجیکٹ ہے۔ پروڈیوسر اسے عالمی سطح پر نمایاں شناخت دلانے کے لیے ہر پہلو پر توجہ دے رہے ہیں۔ جہاں فلم کے پہلے پارٹ کی ریلیز قریب ہے، وہیں دوسرے پارٹ کی شوٹنگ اور تیاری کے لیے ابھی مزید وقت درکار ہے۔ بتایا جا رہا ہے کہ فلم کے ایکشن مناظر تیار کرنے میں اندازے سے زیادہ وقت لگ رہا ہے۔ پروڈیوسر کچھ نئے اور بڑے ایکشن مناظر شامل کرنا چاہتے ہیں، جس کے باعث دوسرے پارٹ کے دائرے کو مزید وسیع اور اسے زیادہ شاندار بنانے پر کام کیا جا رہا ہے۔
نمیت ملہوترا ’رامائن‘ کے ذریعے اس ہندوستانی رزمیہ داستان کو دنیا بھر کے شائقین تک پہنچانا چاہتے ہیں۔ اسی مقصد کے تحت دوسرے پارٹ کی تیاری میں جلد بازی کرنے کے بجائے معیار اور شان و شوکت پر زور دیا جا رہا ہے۔ فلم کی نئی ریلیز تاریخ کا اعلان کب ہوگا، فی الحال اس بارے میں صورت حال واضح نہیں ہے۔ شائقین کو اب فلم میکرز کے باضابطہ اعلان کا انتظار ہے۔
ہندوستھا ن سماچار
ہندوستان سماچار / محمد شہزاد
