ممبئی، 23 اکتوبر(ہ س)۔ قومی فلم ایوارڈ یافتہ ہدایت کار مدھر بھنڈارکر اب ڈاکٹر شیاما پرساد مکھرجی کی زندگی پر فلم بنانے کی تیاری کر رہے ہیں۔ اطلاعات کے مطابق، اس فلم کے ذریعے مکھرجی کی زندگی، ان کے سیاسی سفر اور ان کی وراثت سے جڑے ایسے پہلوؤں کو پردے پر پیش کیا جائے گا، جن کے بارے میں کم ہی بات کی گئی ہے۔
اس فلمی منصوبے کو آدتیہ کمار ہلواسیہ کی حمایت حاصل ہوگی۔ فلم کی تیاری بھنڈارکر انٹرٹینمنٹ اور اے کے ایچ وینچرز کے بینر تلے کی جائے گی۔ توقع ہے کہ فلم پر کام اگلے سال شروع ہوگا۔
رپورٹ کے مطابق، فلم کا ممکنہ نام ’شیاما: دی مسنگ چیپٹر‘ رکھا گیا ہے۔ تاہم، اب تک اس کا باضابطہ اعلان نہیں کیا گیا ہے اور نہ ہی فنکاروں، کہانی یا دیگر تفصیلات کے بارے میں کوئی حتمی معلومات سامنے آئی ہیں۔
بتایا جا رہا ہے کہ مدھر بھنڈارکر اپنی آنے والی فلم ’دی وائیوز آف بالی ووڈ‘ کا کام مکمل کرنے کے بعد اس نئے منصوبے پر توجہ دیں گے۔ ہدایت کار اپنی فلموں میں سماجی مسائل اور حقیقی زندگی سے جڑے موضوعات کو نمایاں کرنے کے لیے جانے جاتے ہیں۔ ایسے میں ڈاکٹر مکھرجی کی زندگی پر بننے والی مجوزہ فلم کو لے کر دلچسپی بڑھ گئی ہے۔
ڈاکٹر شیاما پرساد مکھرجی کی پیدائش 6 جولائی 1901 کو کولکاتا میں ہوئی تھی۔ وہ آزاد ہندوستان کے پہلے وزیر صنعت و شہری رسد اور بھارتیہ جن سنگھ کے بانی تھے۔ بھارتیہ جن سنگھ کو بھارتیہ جنتا پارٹی کی سابقہ تنظیم سمجھا جاتا ہے۔
ڈاکٹر مکھرجی جموں و کشمیر کو خصوصی درجہ دینے والے انتظامی نظام کے مخالف تھے۔ 1953 میں بغیر اجازت نامے کے جموں و کشمیر جانے کے بعد انہیں گرفتار کر لیا گیا تھا۔ 23 جون 1953 کو حراست کے دوران پراسرار حالات میں ان کا انتقال ہوگیا۔ اس وقت ان کی عمر 51 سال تھی۔اب سب کی نظریں اس بات پر ہیں کہ مدھر بھنڈارکر اپنی مجوزہ فلم میں ڈاکٹر مکھرجی کی زندگی کے ان اہم واقعات اور ان کے سیاسی سفر کو کس انداز میں پیش کرتے ہیں۔
ہندوستھان سماچار
ہندوستان سماچار / Mohammad Khan
