ممبئی، 21 اکتوبر (ہ س)۔ فلم ساز رام گوپال ورما نے اپنی آنے والی ایکشن تھرلر فلم ’پولیس کمپنی‘ کی پہلی جھلک جاری کردی ہے۔ اس کے ساتھ ہی انہوں نے فلم کی ریلیز کی تاریخ کا بھی اعلان کیا۔ ٹی سیریز کے بینر تلے بننے والی اس فلم میں اداکار ہرش وردھن رانے مرکزی کردار میں نظر آئیں گے۔ پولیس اور جرائم کی دنیا پر مبنی یہ فلم 4 جون 2027 کو سنیما گھروں میں ریلیز ہوگی۔
فلم کے جاری کردہ پوسٹر میں پولیس اہلکاروں کا بے خوف اور جارحانہ انداز دیکھنے کو ملتا ہے۔ ہرش وردھن رانے فلم میں ممبئی کے معروف انکاؤنٹر اسپیشلسٹ دیا نائک کا کردار ادا کریں گے۔ سچے واقعات سے متاثر اس فلم کی کہانی 1997 سے 2004 کے درمیان ممبئی میں جرائم کی دنیا کے خلاف پولیس کارروائیوں کے گرد گھومتی ہے۔ اس دوران تقریباً 300 گینگسٹروں کی ہلاکت کے واقعات کو فلم کی کہانی کی بنیاد بنایا گیا ہے۔
’پولیس کمپنی‘ میں ہرش وردھن رانے کے علاوہ فردین خان، فاطمہ ثنا شیخ اور پریش راول بھی اہم کرداروں میں نظر آئیں گے۔ رام گوپال ورما نے سوشل میڈیا پر فلم کی پہلی جھلک شیئر کرنے کے ساتھ اس کے کرداروں اور کہانی سے متعلق معلومات بھی فراہم کی ہیں۔ فلم کے اعلان اور پوسٹر جاری ہونے کے بعد ناظرین میں اسے لے کر تجسس بڑھ گیا ہے۔
ہندوستھان سماچار
---------------
ہندوستان سماچار / عبدالواحد
