ممبئی، 21 اکتوبر (ہ س)۔ نیٹ فلکس نے اپنی آنے والی فلم ’میٹھے میں کیا ہے‘ کا ٹریلر جاری کر دیا ہے۔ رتک بھومک اور روہنی ہٹّنگڑی کی اداکاری سے سجی یہ فلم خاندانی رشتوں، دیوالی کی خوشیوں اور گھر میں ہونے والی ہلچل کو مزاحیہ انداز میں پیش کرتی ہے۔ اس فلم کے ذریعے رادھیکا بنسل تور ہدایت کاری کی دنیا میں قدم رکھ رہی ہیں۔ اجیت موہن نے اتھان کیپٹل کے بینر تلے اس فلم کو پروڈیوس کیا ہے۔ فلم میں عائشہ رضا مشرا، ابھے کول، ترانہ راجا، گورو کے شرما اور وکرم بخشی بھی اہم کرداروں میں نظر آئیں گے۔

فلم کی کہانی ایک متوسط ہندوستانی خاندان کے گرد گھومتی ہے، جہاں دیوالی منانے کے لیے تمام رشتے دار ایک ہی چھت کے نیچے جمع ہوتے ہیں۔ تہوار کی خوشیوں اور خاندانی میل جول کے درمیان اس وقت کہانی ایک نیا موڑ لے لیتی ہے، جب اچانک ایک شادی کا اعلان کر دیا جاتا ہے۔ اس کے بعد گھر میں بحث و مباحثے، الجھنوں اور ہنگامے کا سلسلہ شروع ہو جاتا ہے۔ ٹریلر میں روزمرہ کے خاندانی رشتوں کی نوک جھونک اور اہلِ خانہ کے درمیان پیش آنے والے دلچسپ واقعات کی جھلک دکھائی گئی ہے۔

دیوالی کے رنگ اور خاندانی تفریح سے بھرپور یہ فلم ناظرین کو ہنسانے کے ساتھ رشتوں کی خوب صورت کہانی پیش کرنے کی کوشش کرتی ہے۔ ٹریلر کے اجرا کے ساتھ ہی فلم کی ریلیز کی تاریخ کا بھی اعلان کر دیا گیا ہے۔

’میٹھے میں کیا ہے‘ 30 اکتوبر کو نیٹ فلکس پر ریلیز ہوگی۔

ہندوستھان سماچار

---------------

ہندوستان سماچار / عبدالسلام صدیقی