کرکٹ کے میدان پر ستاروں کا جلوہ نظر آئے گا، سیلوٹ ترنگا لیگ کا آغاز

ممبئی، 17 اکتوبر (ہ س)۔ تفریحی دنیا کے ستارے اب کرکٹ کے میدان پر بھی اپنا جلوہ دکھانے کے لیے تیار ہیں۔ سیلوٹ ترنگا کرکٹ لیگ (ایس ٹی سی ایل) کی ٹرافی اور جرسی کی جمعہ کے روز ممبئی میں نقاب کشائی کی گئی۔ اس موقع پر سابق ہندوستانی کرکٹر چیتن شرما، بین الاقوامی پہلوان اور لیگ کے برانڈ ایمبیسیڈر سنگرام سنگھ، سابق کرکٹر اشوک ملہوترا اور پروڈیوسر ونود بچن سمیت کھیل اور تفریحی دنیا کی کئی سرکردہ شخصیات موجود تھیں۔

اس لیگ سے متعدد اداکارائیں اور معروف شخصیات ٹیم مالکان کے طور پر وابستہ ہوئی ہیں۔ پنجاب کی ٹیم سے پرب گریوال، اتر پردیش سے نیلم گری، ممبئی سے اشنور کور، دہلی سے النکرتا سہائے، تمل ناڈو سے اسٹیفی پٹیل، راجستھان سے کشیکا کپور، ہریانہ سے ثناء سلطان اور گجرات سے دلجوت وابستہ ہیں۔ ان ستاروں کی موجودگی سے لیگ کو تفریحی دنیا کا بھی بھرپور ساتھ ملا ہے۔

لیگ کمشنر چیتن شرما نے کہا کہ ملک کے چھوٹے شہروں اور گاوں میں کرکٹ کے ٹیلنٹ کی کوئی کمی نہیں ہے، لیکن مالی پریشانیوں اور مواقع کے فقدان کی وجہ سے کئی کھلاڑی آگے نہیں بڑھ پاتے۔ ایس ٹی سی ایل کا مقصد ایسے کھلاڑیوں کو اپنی صلاحیت ثابت کرنے کا پلیٹ فارم فراہم کرنا ہے۔ صدر راجیش جھا، نائب صدر روی چکار، ڈائریکٹر مکیش سنگھ اور مینٹور اشوک ملہوترا بھی لیگ سے وابستہ ہیں۔ منتظمین کے مطابق، 16 سال سے زائد عمر کے منتخب کھلاڑیوں کو مفت رہائش، کھانا، ٹرانسپورٹ اور میچ فیس جیسی سہولیات فراہم کرنے کا منصوبہ ہے۔ لیگ کا مقصد باصلاحیت کھلاڑیوں کو مالی رکاوٹوں سے آزاد کر کے بہتر مواقع فراہم کرنا ہے۔ اب دیکھنا ہوگا کہ ستاروں سے سجی یہ لیگ کرکٹ کی نئی صلاحیتوں کو کتنی بلندیوں تک پہنچاتی ہے۔

ہندوستھان سماچار

---------------

ہندوستان سماچار / انظر حسن