ممبئی، 15 اکتوبر (ہ س)۔ اداکار وویک اوبرائے نے بالی ووڈ میں طاقتور لوگوں کے اثر و رسوخ اور اپنے کریئر کے مشکل دور کے بارے میں کھل کر بات کی ہے۔ ایک حالیہ انٹرویو میں انہوں نے بتایا کہ غلط باتوں کے خلاف آواز اٹھانے کے بعد انہیں کافی پریشانیوں کا سامنا کرنا پڑا۔

وویک کے مطابق، کامیاب فلمیں دینے اور ایوارڈ جیتنے کے باوجود ان کے لیے حالات مشکل ہوتے چلے گئے۔ انہوں نے دعویٰ کیا کہ ایک طاقتور لابی کے اثر و رسوخ کی وجہ سے ان کے ساتھ کام کرنے کے لیے تیار لوگ بھی پیچھے ہٹنے لگے تھے۔

انہوں نے بتایا کہ ابتدا میں کچھ لوگ اخلاقی بنیادوں پر ان کے ساتھ کھڑے رہے، لیکن چند ہی ہفتوں بعد انہوں نے بھی ان سے دوری اختیار کر لی۔ اداکار کے مطابق، کئی لوگوں کو انڈر ورلڈ سے فون آنے لگے تھے اور انہیں دھمکیاں دی جاتی تھیں کہ اگر انہوں نے وویک کے ساتھ کام کیا تو انہیں سنگین نتائج بھگتنے پڑیں گے۔ وویک نے کہا کہ ایسے حالات میں لوگوں نے اپنی اور اپنے اہل خانہ کی حفاظت کو ترجیح دی اور ان کے ساتھ کام کرنے سے انکار کر دیا۔ انہوں نے اس پورے واقعے کو اپنی زندگی کا انتہائی مشکل دور قرار دیا۔

وویک اوبرائے 2003 میں سلمان خان کے ساتھ تنازعہ اور اپنی پریس کانفرنس کے حوالے سے بھی سرخیوں میں رہے تھے۔ اس واقعے کے بعد بالی ووڈ میں کئی لوگوں کے ساتھ ان کے تعلقات کو لے کر سوالات اٹھے تھے۔ اب اپنے حالیہ بیان میں وویک نے اس دور کی مشکلات کو یاد کرتے ہوئے فلمی صنعت میں بااثر لوگوں کے کردار پر سوال اٹھائے ہیں۔ تاہم، اس گفتگو میں دستیاب معلومات سے ان کے دعوو¿ں کی آزادانہ طور پر تصدیق نہیں ہوتی۔

ہندوستھان سماچار

ہندوستان سماچار / محمد شہزاد