ممبئی، 14 اکتوبر (ہ س)۔ نتیش تیواری کی آنے والی فلم ’رامائن‘ میں یش راون کا کردار ادا کرنے جا رہے ہیں۔ ان کے روپ پر اداکار آریہ ببر نے اپنے ردعمل کا اظہار کیا ہے۔ ایک حالیہ انٹرویو میں آریہ نے کہا کہ یش کے راون والے روپ میں فی الحال انہیں کچھ نیا نظر نہیں آیا۔ انہوں نے اس کا موازنہ یش کی فلم ’کے جی ایف‘ کے روپ سے کیا۔ تاہم، آریہ نے یہ بھی کہا کہ پوری فلم دیکھنے کے بعد ہی ان کے کردار کے بارے میں کوئی حتمی رائے قائم کی جا سکتی ہے۔

آریہ ببر ان دنوں تھیٹر ڈرامے ’مہابلی‘ میں راون کا کردار ادا کر رہے ہیں۔ گفتگو کے دوران انہوں نے فلم ’آدی پُرش‘ میں سیف علی خان کی اداکاری کا دفاع کیا۔ آریہ کے مطابق، سیف نے ہدایت کار کے نقطۂ نظر کے مطابق کردار ادا کیا اور اس میں الگ شدت پیدا کرنے کی کوشش کی۔ انہوں نے کہا کہ کسی کردار کی پیش کش کے لیے صرف اداکار کو ذمہ دار ٹھہرانا درست نہیں ہے۔ وہیں، یش کے روپ پر تبصرہ کرتے ہوئے انہوں نے کہا کہ اداکار کا نیا انداز انہیں فلم ’ٹاکسک‘ میں دیکھنے کو ملا تھا۔

نتیش تیواری کی ہدایت کاری میں بن رہی فلم ’رامائن‘ میں رنبیر کپور بھگوان رام، سائی پلوی ماتا سیتا، یش راون، روی دوبے لکشمن اور سنی دیول ہنومان کے کردار میں نظر آئیں گے۔ فلم میں ارون گوول، لارا دتہ، راکل پریت سنگھ اور وویک اوبرائے بھی اہم کرداروں میں ہیں۔

نمیت ملہوترا کی پروڈکشن میں بننے والی یہ فلم دو حصوں میں ریلیز ہوگی۔ اس کا پہلا حصہ 5 نومبر کو سنیما گھروں میں ریلیز کیا جائے گا۔

ہندوستھان سماچار

---------------

ہندوستان سماچار / عبدالواحد