ممبئی، 12 اکتوبر (ہ س)۔ بالی ووڈ اداکارہ ودیا بالن کی سپرہٹ فلم ’دی ڈرٹی پکچر‘ کے مداحوں کے لیے اچھی خبر ہے۔ سال 2011 میں ریلیز ہونے والی اس فلم کا سیکوئل بننے جا رہا ہے۔ فلم کی پروڈیوسر ایکتا کپور نے ’دی ڈرٹی پکچر 2‘ بنانے کی تصدیق کی ہے۔ وہ گزشتہ کئی برسوں سے اس کے دوسرے حصے پر غور کر رہی تھیں، لیکن کہانی سے مطمئن ہونے کے بعد ہی اس منصوبے کو آگے بڑھانا چاہتی تھیں۔
ایک گفتگو کے دوران ایکتا کپور نے بتایا کہ وہ طویل عرصے سے اس فلم کے سیکوئل کی منصوبہ بندی کر رہی تھیں۔ اب انہیں لگتا ہے کہ ان کے پاس ایسی کہانی ہے، جسے ناظرین کے سامنے پیش کیا جانا چاہیے۔ انہوں نے ’دی ڈرٹی پکچر‘ کو اپنی اہم فلموں میں سے ایک قرار دیتے ہوئے کہا کہ تقریباً 15 سال بعد وہ اس کے دوسرے حصے کی تیاری کر رہی ہیں۔
تاہم، ایکتا کپور نے سیکوئل کی کہانی اور اس کے کرداروں کے بارے میں زیادہ تفصیلات شیئر نہیں کیں۔ انہوں نے صرف اتنا اشارہ دیا کہ اس بار کہانی کسی ایک شخص کی زندگی پر مبنی ہوگی۔
واضح رہے کہ ’دی ڈرٹی پکچر‘ میں ودیا بالن نے جنوبی ہند کی اداکارہ سلک اسمیتا سے متاثر ایک کردار ادا کیا تھا۔ فلم میں عمران ہاشمی، نصیرالدین شاہ اور تشار کپور نے بھی اہم کردار نبھائے تھے۔ فلم کو ناظرین کی جانب سے زبردست پذیرائی ملی تھی اور ودیا بالن کی اداکاری کو بھی کافی سراہا گیا تھا۔
ابھی یہ واضح نہیں ہے کہ سیکوئل میں کون سے اداکار نظر آئیں گے، فلم کی ہدایت کاری کون کرے گا اور اسے کب ریلیز کیا جائے گا۔ ان تفصیلات کا اعلان ہونا ابھی باقی ہے۔
ہندوستھان سماچار
ہندوستان سماچار / Mohammad Khan
