پولیس کی خواتین اور بچوں کے لیے بتکما تہوار پر حفاظتی ہدایات جاریحیدرآباد، 10 اکتوبر (ہ س)۔ ملکاجگیری پولیس نے بتکما تہوار منانے والی خواتین اور بچوں کے لیے حفاظتی ہدایات جاری کرتے ہوئے عوام سے اپیل کی ہے کہ وہ تلنگانہ کی ثقافتی روایات کو برقرار رکھتے ہوئے تہوار کو محفوظ اور پُرامن انداز میں منائیں۔

پولیس کی جانب سے چلائی جانے والی بیداری مہم کے تحت پُرامن تقریبات کو یقینی بنانے کے لیے نواہم احتیاطی تدابیر پر روشنی ڈالی گئی ہے۔پولیس نے عوام کو مشورہ دیا ہے کہ بتکما کے وسرجن کے لیے جھیلوں یا تالابوں میں نہ اتریں اور مقررہ وسرجن مقامات پر حفاظتی ہدایات پر عمل کریں۔ والدین سے بھی اپیل کی گئی ہے کہ وہ بچوں پر کڑی نظر رکھیں اور بھیڑ بھاڑ والے مقامات پر ان کی حفاظت کو یقینی بنائیں۔

خواتین کو مشورہ دیا گیاہے کہ وہ مشتبہ سرگرمیوں کے تعلق سے چوکس رہیں، مہنگے زیورات اور قیمتی اشیاء ساتھ لے جانے سے گریز کریں اور اپنے سامان کی حفاظت کا خاص خیال رکھیں۔ اس کے علاوہ تہوار کی تقریبات میں شرکت کرنے والوں کو پینے کا پانی اور صحت بخش ہلکی غذائیں ساتھ رکھنے کی ترغیب دی گئی ہے۔

جاری کردہ ہدایات میں ذمہ دارانہ رویہ اختیار کرنے، عوامی مقامات پر صفائی برقرار رکھنے اور شراب نوشی سمیت ایسی سرگرمیوں سے گریز کرنے پر بھی زور دیا گیا ہے جن سے تہوار کا ماحول خراب ہوسکتا ہے۔پولیس نے عوام کو مشورہ دیا ہے کہ وہ محفوظ طریقے سے اپنے گھروں کو واپس لوٹیں اور رات دیر گئے غیر ضروری سفر سے گریز کریں۔

عوام سے اپیل کی گئی ہے کہ کسی بھی مشتبہ سرگرمی کی اطلاع فوری طور پر پولیس کو دیں اور ہنگامی صورتحال میں بلا تاخیر مدد حاصل کریں۔ تہوار کے مقامات اور وسرجن مراکز پر تعینات پولیس اہلکاروں کے ساتھ تعاون کرنے کی بھی درخواست کی گئی ہے۔

ہندوستھان سماچار

ہندوستان سماچار / محمدعبدالخالق