چنڈی گڑھ نئی دہلی، 08جنوری(ہ س )۔

پنجاب میں منشیات کے خلاف جدوجہد کو مزید تیز کرتے ہوئے عام آدمی پارٹی کے قومی کنوینر اروند کیجریوال اور پنجاب کے وزیر اعلیٰ بھگونت سنگھ مان نے بدھ کے روز پھگواڑہ کی لولی پروفیشنل یونیورسٹی میں یُدھ نشّیاں وِرُدھ کے دوسرے مرحلے کا آغاز کیا۔ اس کے ذریعے ریاست میں جاری سخت کارروائی کو ایک ہمہ گیر عوامی تحریک کی شکل دی گئی۔یونیورسٹی کیمپس میں ایک بڑے اجتماع سے خطاب کرتے ہوئے اروند کیجریوال نے پہلے مرحلے کی ٹھوس کامیابیوں کا حوالہ دیا، جن میں منشیات اسمگلروں کے خلاف بڑے پیمانے پر کارروائیاں، سزا کی بلند شرح اور عوامی شمولیت میں اضافہ شامل ہے۔ انہوں نے کہا کہ دوسرا مرحلہ ان کامیابیوں کو مستحکم کرتے ہوئے پورے پنجاب میں منشیات کے نیٹ ورک کو فیصلہ کن طور پر ختم کرے گا۔اجتماع سے خطاب کرتے ہوئے اروند کیجریوال نے کہا، (منشیات کے خلاف جنگ) کے پہلے مرحلے کی شاندار کامیابی کے بعد آج دوسرے مرحلے کا آغاز ہو رہا ہے۔ پہلا مرحلہ یکم مارچ 2025 کو شروع ہوا تھا، یعنی تقریباً دس ماہ پہلے، اور جس ایمانداری، محنت اور عزم کے ساتھ اس پر عمل کیا گیا، ویسا منظر نہ صرف پنجاب بلکہ پورے ملک کی کسی بھی ریاست میں منشیات کے خلاف لڑائی میں کبھی دیکھنے کو نہیں ملا۔ منشیات صرف پنجاب میں ہی نہیں بکتی۔ ہریانہ، گجرات، دہلی اور کئی دیگر ریاستوں میں بھی کھلے عام اور بڑے پیمانے پر منشیات فروخت ہوتی ہے، مگر وہاں کی حکومتیں اس کی پروا نہیں کرتیں۔عام آدمی پارٹی کے سربراہ نے سابقہ حالات یاد کرتے ہوئے کہا، پنجاب میں ہم سے پہلے، جب شرومنی اکالی دل کی حکومت تھی، ان کے دور میں ہر گلی اور ہر گھر میں منشیات پھیلائی گئی۔ اسی زمانے میں پنجاب اس قدر منشیات کی دلدل میں پھنس گیا کہ اڑتا پنجاب جیسی فلم بنی۔ گھروں تک منشیات پہنچ گئیں اور ان کے کئی بڑے لیڈر خود اس دھندے میں ملوث تھے۔ اس کے بعد کیپٹن امریندر سنگھ نے گٹکا صاحب پر حلف لے کر کہا کہ وہ تیس یا ساٹھ دن میں منشیات ختم کر دیں گے، مگر پانچ سالہ حکومت میں کچھ نہیں ہوا۔ وہ سب جھوٹے وعدے تھے۔ اس کے بعد ہماری حکومت آئی۔ انہوں نے مزید کہا، ہم نے کچھ وقت تیاری میں لگایا، مگر گزشتہ سال یکم مارچ کے بعد جس شدت اور جرات کے ساتھ منشیات کے خلاف کارروائی شروع کی گئی، وہ بے مثال ہے۔ بہت سے لوگوں نے ہمیں ڈرایا کہ منشیات اسمگلر خطرناک ہیں، بڑے گینگسٹر اور جرائم پیشہ ہیں، وہ ہمارے خاندانوں کو نقصان پہنچا سکتے ہیں۔ ہم نے کہا نہیں، ہم عوام سے وعدہ کر کے آئے ہیں کہ پنجاب کو منشیات سے پاک کریں گے اور اپنے بچوں کا مستقبل محفوظ بنائیں گے۔

انہوں نے کہا، میں اس وقت تک چین سے نہیں بیٹھوں گا جب تک اس مسئلے کو جڑ سے ختم نہ کر دیا جائے۔ یُدھ نشّیاں وِرُدھ کا دوسرا مرحلہ پہلے سے بھی زیادہ کامیاب ہوگا اور پنجاب ایک نئی کامیابی کی داستان رقم کرے گا۔

ہندوستھان سماچار

ہندوستان سماچار / Md Owais Owais