مدھیہ پردیش میں سردی کا ستم جاری، کئی اضلاع میں پارہ 5 ڈگری سے نیچے، ویسٹرن ڈسٹربنس سے بارش کا امکان
۔ ریاست کے شمالی علاقوں میں کوہرا چھا رہا
بھوپال، 15 جنوری (ہ س)۔ مدھیہ پردیش میں سرد ہواوں کی وجہ سے ٹھنڈ کا اثر بڑھ گیا ہے۔ دارالحکومت بھوپال سمیت پوری ریاست میں سردی کا اثر مسلسل برقرار ہے۔ نومبر-دسمبر کے بعد جنوری میں بھی ٹھنڈ کے پرانے ریکارڈ ٹوٹتے نظر آ رہے ہیں۔ کئی اضلاع میں کم از کم درجہ حرارت 7 ڈگری سے نیچے پہنچ گیا ہے۔ ریاست میں سرد ہواوں کی وجہ سے رات کے درجہ حرارت میں مزید گراوٹ درج کی گئی ہے۔ شہڈول اور کٹنی میں پارہ 5 ڈگری سیلسیس سے نیچے چلا گیا ہے، جبکہ گوالیار اور بھوپال میں بھی راتیں شدید سردی سے متاثر ہیں۔
محکمہ موسمیات کے مطابق، 16 جنوری سے ہمالیائی خطے میں ایک مضبوط ’ویسٹرن ڈسٹربنس‘ سرگرم ہو رہا ہے۔ اس کے اثر سے 3 سے 4 دن بعد مدھیہ پردیش میں ’ماوٹھا‘ یعنی بارش ہونے کا امکان ہے۔ فی الحال مغربی حصے کے پاس سے ایک ’ٹرف‘ گزر رہی ہے، لیکن اس کا براہ راست اثر ریاست پر نہیں پڑ رہا ہے۔ ویسٹرن ڈسٹربنس کے مضبوط ہونے کے سبب کئی اضلاع میں بادل چھانے اور ہلکی بارش کی صورتحال بن سکتی ہے۔
وہیں، مشرقی-شمالی ہند کے اوپر سطح سمندر سے تقریباً 12.6 کلومیٹر کی اونچائی پر ’جیٹ اسٹریم‘ہوائیں تقریباً 204 کلومیٹر فی گھنٹے کی رفتار سے چل رہی ہیں۔ اس کا اثر ایم پی میں بھی محسوس کیا جا رہا ہے۔ بدھ کو بھوپال سمیت کئی اضلاع میں دن کے وقت بھی ٹھنڈی ہوائیں چلیں۔ حالانکہ تیز دھوپ نکلنے سے کچھ وقت کے لیے سردی سے راحت ملی۔
ریاست کے شمالی علاقوں گوالیار، چمبل، ساگر اور ریوا ڈویژن میں کہرے کی صورتحال بنی ہوئی ہے۔ جمعرات کی صبح گوالیار، مرینا، بھنڈ، دتیا، نیواڑی، ٹیکم گڑھ، چھترپور، پنا، ستنا اور ریوا میں درمیانہ کوہرا دیکھا گیا۔ وہیں بھوپال، اندور، اجین، رائسین، سیہور، شاجاپور، گنا، راج گڑھ، رتلام اور منڈلا سمیت کئی اضلاع میں ہلکا کوہرا چھایا رہا۔ کوہرے کا اثر ریل ٹریفک پر بھی پڑ رہا ہے۔ دہلی سے بھوپال، اندور اور اجین آنے والی کئی ٹرینیں اپنے مقررہ وقت سے تاخیر سے چل رہی ہیں۔
بدھ کی رات شہڈول کے کلیان پور میں کم از کم درجہ حرارت 4.8 ڈگری اور کٹنی کے کرونڈی میں 4.9 ڈگری سیلسیس درج کیا گیا۔ ریوا میں 5.8 ڈگری، مندسور اور چترکوٹ میں 6.1 ڈگری، کھجوراہو میں 6.2 ڈگری، امریا میں 6.8 ڈگری، دتیا اور منڈلا میں 7 ڈگری درجہ حرارت رہا۔ ریاست کے پانچ بڑے شہروں میں گوالیار سب سے ٹھنڈا رہا، جہاں کم از کم درجہ حرارت 7.1 ڈگری درج کیا گیا۔ بھوپال میں 9.8 ڈگری، اندور میں 10.2 ڈگری، اجین میں 11.2 ڈگری اور جبل پور میں 10 ڈگری سیلسیس درجہ حرارت رہا۔
ہندوستھان سماچار
---------------
ہندوستان سماچار / انظر حسن
