نئی دہلی، 15 ستمبر (ہ س)۔ فلم اداکار ابھیشیک بچن اور اداکارہ ایشوریہ رائے کے بعد اب فلم پروڈیوسر کرن جوہر نے بھی دہلی ہائی کورٹ میں درخواست دائر کی ہے جس میں ان کی تصاویر، آواز اور دیگر ذاتی علامتوں کو ان کی اجازت کے بغیر استعمال نہ کرنے کا مطالبہ کیا گیا ہے۔ اس سے قبل ہائی کورٹ نے ابھیشیک بچن اور ایشوریہ رائے پر ان کے نام، آواز اور تصاویر کے ساتھ ان کی ذاتی چیزوں کے غیر مجاز استعمال پر پابندی عائد کر دی تھی۔

ابھیشیک بچن کی عرضی پر سماعت کرتے ہوئے ہائی کورٹ نے کہا تھا کہ کسی بھی شخص کی شخصیت سے متعلق کسی بھی علامت کا استعمال اس کے پرائیویسی کے حق کی خلاف ورزی ہے اور اس سے عزت کے ساتھ جینے کا حق بھی متاثر ہوتا ہے۔ ہائی کورٹ نے متعلقہ یو آر ایل (ویب لنکس) کو ہٹانے کی ہدایت کی تھی جو ابھیشیک بچن کی شخصیت سے متعلق کسی بھی چیز کو بغیر اجازت کے استعمال کر رہے تھے۔ عدالت نے کہا تھا کہ اے آئی اور ڈیپ فیک جیسی ٹیکنالوجی کا استعمال کرتے ہوئے ان کے نام اور تصویر کا غلط استعمال کرکے نہ صرف مالی نقصان پہنچایا جا رہا ہے بلکہ ان کی ساکھ، وقار اور نیک نیتی کو بھی نقصان پہنچایا جا رہا ہے۔

اس سے قبل ہائی کورٹ نے اداکارہ ایشوریہ رائے کی شخصیت سے متعلق علامتوں اور مواد کے بغیر اجازت کے استعمال پر پابندی عائد کر دی تھی۔ ایشوریہ رائے کی درخواست میں کہا گیا کہ ایشوریہ نیشن ویلتھ نامی فرم اپنے لیٹر ہیڈ میں بطور چیئرپرسن ایشوریہ رائے کی تصویر استعمال کرتی ہے، جبکہ ایشوریا رائے کو اس بارے میں کوئی پیشگی علم نہیں ہے۔ ایسا کرنا سراسر دھوکہ دہی ہے۔ درخواست میں ان ویب سائٹس اور ایپس کا ذکر کیا گیا ہے جو ان کے نام کا استعمال کرتے ہوئے پائے گئے ہیں۔

---------------

ہندوستان سماچار / عبدالسلام صدیقی