جونپور، 15 ستمبر (ہ س)۔ اتوار کی رات لائن بازار تھانہ علاقے کے سیہی پور کراسنگ کے قریب اس وقت افراتفری مچ گئی جب چار دھام یاترا پر آنے والے عقیدت مندوں سے بھری ڈبل ڈیکر سیاحتی بس اور ایک ٹریلر کے درمیان زبردست تصادم میں چار افراد موقع پر ہی ہلاک ہو گئے جبکہ نصف درجن سے زیادہ مسافر شدید زخمی ہو گئے۔ اطلاع ملتے ہی پولیس کی بھاری نفری موقع پر پہنچ گئی اور زخمیوں کو ضلع اسپتال میں داخل کرایا گیا۔ جاں بحق افراد کی لاشیں مردہ خانے میں رکھ دی گئی ہیں۔ لواحقین کے آنے کے بعد انہیں پوسٹ مارٹم کے لیے بھیج دیا جائے گا۔
معلومات کے مطابق سیاحوں کی بس چھتیس گڑھ کے کانکیر ضلع سے عقیدت مندوں کے ساتھ درشن کے لیے ایودھیا آئی تھی۔ درشن کے بعد مسافر وارانسی کاشی وشوناتھ مندر کے لیے روانہ ہوئے۔ راستے میں سیہی پور کراسنگ کے قریب بس آگے بڑھنے والے ٹریلر سے ٹکرا گئی۔ بس میں کل 50 مسافر سوار تھے۔ مرنے والوں میں آشا بھوال، گلاب، ڈرائیور دیپک اور ایک ریکھا برنک شامل ہیں۔ زخمیوں کا ضلع اسپتال میں علاج چل رہا ہے۔
واقعہ کی اطلاع ملتے ہی پولیس سپرنٹنڈنٹ ڈاکٹر کوستوبھ، ایڈیشنل سپرنٹنڈنٹ آف پولیس نگر اور سٹی مجسٹریٹ جونپور ضلع اسپتال پہنچے۔ انہوں نے زخمیوں سے ملاقات کی اور ان کے علاج کے بارے میں دریافت کیا اور ڈاکٹروں کو بہتر علاج کی ہدایت کی۔ انہوں نے زخمیوں اور ان کے اہل خانہ کو ہر ممکن مدد اور فوری علاج فراہم کرنے کا بھی یقین دلایا۔ پولیس سپرنٹنڈنٹ ڈاکٹر کوستوبھ نے بتایا کہ دیر رات لائن بازار تھانہ علاقہ کے تحت سیہی پور کے قریب عقیدت مندوں سے بھری ایک بس جو ایودھیا سے وارانسی جا رہی تھی بے قابو ہونے کی وجہ سے آگے جا رہے ٹریلر سے ٹکرا گئی، جس میں چار لوگوں کی موت ہو گئی۔ 9 افراد زخمی ہیں جن کا علاج ضلع اسپتال میں کیا جا رہا ہے۔ دوسری جانب پیر کو جونپور کے ضلع مجسٹریٹ ڈاکٹر دنیش چندر سنگھ نے بتایا کہ رات کو پیش آنے والے اس حادثے میں چار لوگوں کی موت ہو گئی تھی۔ جو محفوظ رہے انہیں پولیس لائن میں رکھا گیا۔ آج انہیں گاڑی کے ذریعے ان کے گھروں کو بھیجا جا رہا ہے۔ وزیر اعلیٰ کے حکم سے انہیں مناسب انتظامات کے ساتھ ان کے گھروں کو روانہ کیا جا رہا ہے۔
---------------
ہندوستان سماچار / عبدالسلام صدیقی
