کولکاتا، 15 ستمبر (ہ س)۔ وزیر اعظم نریندر مودی نے پیر کے روز کولکاتا میں وجے درگ میں ہندوستانی فوج کے ایسٹرن کمانڈ ہیڈ کوارٹر میں تین روزہ کمبائنڈ کمانڈرز کانفرنس (سی سی سی) کا افتتاح کیا۔ اس موقع پر انہوں نے مسلح افواج کی بہادری اور آپریشن سندور میں ان کے کردار کی تعریف کی۔

کانفرنس کا افتتاح کرتے ہوئے وزیراعظم نے آپریشن سندور میں اہم کردار ادا کرنے والے فوجیوں کی حوصلہ افزائی کی اور ان کے حوصلے بلند کئے۔ انہوں نے کہا کہ مسلح افواج کا کردار صرف سیکیورٹی تک محدود نہیں ہے بلکہ وہ قوم کی تعمیر میں بھی اہم کردار ادا کر رہی ہیں۔

وزیراعظم نے کہا کہ یہ صرف فوجی آپریشنز کا پلیٹ فارم نہیں ہے بلکہ قومی سلامتی کی جامع حکمت عملی کا بھی ہے۔ اصلاح، تبدیلی اور مستقبل کے لیے تیاری — یہ ہماری سمت ہونی چاہیے۔ انہوں نے کہا کہ فوج کو نئی ٹیکنالوجی، ڈومین انٹیگریشن اور سائبر اور خلائی سیکورٹی جیسے شعبوں میں بھی تیزی سے مضبوط کرنے کی ضرورت ہے۔

اس موقع پر وزیر اعظم نے 'انڈین آرمڈ فورسز وژن 2047' دستاویز کی نقاب کشائی بھی کی۔ یہ دستاویز مستقبل کے چیلنجوں سے نمٹنے کے لیے افواج کو تیار کرنے کے لیے ایک روڈ میپ پیش کرتی ہے۔

وزیر دفاع راج ناتھ سنگھ، قومی سلامتی کے مشیر اجیت ڈوول، چیف آف ڈیفنس اسٹاف جنرل انیل چوہان، دفاعی سیکریٹری راجیش کمار سنگھ اور تینوں مسلح افواج کے سربراہان نے کانفرنس میں شرکت کی۔

کانفرنس میں موجود دفاعی حکام نے کہا کہ آپریشن سندور سرحد پار دہشت گردی کے بنیادی ڈھانچے کو تباہ کرنے کے لیے ایک منصوبہ بند آپریشن تھا۔ جس میں آرمی، ایئر فورس اور نیوی کے مشترکہ ایکشن نے پیشہ ورانہ مہارت اور درست حکمت عملی کا مظاہرہ کیا۔

وزارت دفاع کے مطابق اس کانفرنس میں افواج کی جدید کاری، مشترکہ آپریشنز، انضمام اور ملٹی ڈومین جنگی صلاحیت میں اضافہ جیسے اسٹریٹجک موضوعات پر بات چیت کی جا رہی ہے۔ یہ کانفرنس ہر دو سال بعد منعقد ہونے والا ایک اعلیٰ سطحی فورم ہے، جہاں ملک کی سویلین اور عسکری قیادت تزویراتی اور ادارہ جاتی ترجیحات پر تبادلہ خیال کرتی ہے۔ اس سال کی کانفرنس کا تھیم 'اصلاحات کا سال - مستقبل کے لیے تبدیلی' رکھا گیا ہے۔

قابل ذکر ہے کہ وزیر اعظم مودی کا گزشتہ پانچ مہینوں میں مغربی بنگال کا یہ چوتھا اور ایک ماہ کے اندر دوسرا دورہ ہے۔ وہ اتوار کی شام آسام سے کولکاتا پہنچے اور راج بھون میں رات گزارے۔ وہ پیر کی صبح تقریباً 9:30 بجے کانفرنس کے مقام وجے درگ پہنچے اور تقریباً چار گھنٹے تک افتتاحی اجلاس میں موجود رہے۔ دوپہر 1:30 بجے وزیر اعظم ہیلی کاپٹر کے ذریعے نیتا جی سبھاش چندر بوس بین الاقوامی ہوائی اڈے پر پہنچے اور وہاں سے بہار کے پورنیا کے لیے روانہ ہوئے۔

---------------

ہندوستان سماچار / عبدالسلام صدیقی