پٹنہ،15ستمبر(ہ س)۔راجدھانی پٹنہ کی سڑکوں پر پیر کے روزسب انسپکٹر اور پولیس بھرتی کا مطالبہ کرتے ہوئے امیدواروں نے زوردار مظاہرہ کیا۔ امیدواروں کی بڑی تعداد جھنڈوں کے ساتھ سڑکوں پر نکل آئی اور اپنے مطالبات کے حق میں نعرے بازی کی۔ امیدواروں کا کہنا ہے کہ بھرتی کے عمل میں تاخیر اور بے ضابطگیوں پر وہ کافی عرصے سے احتجاج کر رہے ہیں۔

احتجاج کرنے والے امیدواروں نے وزیر اعلیٰ کی رہائش گاہ کا گھیراؤ کرنے کا منصوبہ بنایا تھا۔ اس کے لیے وہ جلوس کی شکل میں وزیر اعلیٰ کی رہائش گاہ کی طرف بڑھے لیکن انتظامیہ نے ڈاک بنگلہ چوراہے پر ہی بیریکیڈنگ کر دیں۔ سیکورٹی کے پیش نظر وزیراعلیٰ کی رہائش گاہ کے اطراف پولیس کی نفری بھی بڑھا دی گئی ہے۔

اس مظاہرے کو نہ صرف امیدواروں بلکہ اساتذہ کی طرف سے بھی حمایت حاصل ہوئی ہے۔ کئی اساتذہ اور اساتذہ تنظیم کے رہنما بھی اس تحریک میں شامل ہوئے اور حکومت سے مطالبہ کیا کہ بھرتی کا عمل جلد از جلد مکمل کیا جائے۔ مظاہرین نے خبردار کیا ہے کہ اگر ان کے مطالبات کو نظر انداز کیا گیا تو تحریک مزید تیز کی جائے گی۔

مظاہرین کا کہنا ہے کہ بہار پولیس سروس کمیشن اور سنٹرل سلیکشن بورڈ اپنا کیلنڈر جاری کریں۔ ان کا کہنا تھا کہ ان مطالبات کا مقصد بہار پولیس اور سب انسپکٹر کی بھرتی کے عمل میں مزید شفافیت لانا ہے۔ پٹنہ میں سڑک پر احتجاج کرنے والے طلباء کی تعداد اتنی زیادہ تھی کہ پولیس نے انہیں جے پی گولمبر کے قریب روکنے کی کوشش کی لیکن وہ سیدھے ڈاک بنگلہ چوراہا کی طرف بڑھ گئے۔

ہندوستھان سماچار

ہندوستان سماچار / Mohammad Afzal Hassan