چھ گرفتار، پستول، ریوالور اور کارتوس برآمد

مرزا پور، 31 اگست (ہ س)۔ پولیس نے ضلع میں غیر قانونی اسلحہ کی اسمگلنگ میں ملوث گینگ کا پردہ فاش کرتے ہوئے 6 ملزمان کو گرفتار کر لیا۔ ملزمان کے قبضے سے تین پستول مع میگزین، چار ریوالور اور زندہ کارتوس برآمد ہوئے۔ گرفتار ملزمان بہار کے مونگیر سے غیر قانونی اسلحہ منگواتے تھے اور ضلع میں فروخت کرتے تھے۔

اتوار کو پولیس لائن آڈیٹوریم میں منعقدہ پریس کانفرنس کے دوران ایڈیشنل سپرنٹنڈنٹ آف پولیس سٹی رتیش سنگھ نے بتایا کہ ایس ایس پی سومن برما کی ہدایت پر جرائم پیشہ افراد اور غیر قانونی ہتھیاروں کے کاروبار کے خلاف چلائی جارہی مہم کے تحت تھانہ کوتوالی کٹرہ، ایس او جی اور سرویلنس ٹیم نے یہ کارروائی کی۔ ٹیم کو ایک مخبر سے اطلاع ملی کہ گیارہ تختہ نالہ پل کے قریب بغیر نمبر پلیٹ والی بلٹ بائیک پر دو نوجوان غیر قانونی اسلحہ اسمگل کرنے آرہے ہیں۔ پولیس نے انہیں گھیر لیا اور سندیپ ولد وجے شنکر اور اروند کمار بند ولد جئے پرکاش بند (دونوں ساکن تھانہ کوتوالی دیہات، مرزا پور) کو گرفتار کر لیا۔ ملزمان کے قبضے سے دو پستول، ایک پستول مع میگزین اور تین زندہ کارتوس برآمد ہوئے۔

پوچھ گچھ کی بنیاد پر پولیس نے مزید چار ملزمین دیو پرکاش عرف آشیش بند، آشیش کمار بند (وارنسی)، پردیپ عرف کھیساری بند اور سورج بند (سون بھدر) کو گرفتار کیا۔ ان کے قبضے سے دو پستول مع میگزین، دو دیسی ساختہ پستول اور چار کارتوس برآمد ہوئے۔

گرفتار ملزمان نے اعتراف کیا کہ انہوں نے بہار کے مونگیر سے غیر قانونی ہتھیار منگوائے اور انہیں ضلع کے نوجوانوں کو مہنگے داموں فروخت کیا اور کمائی آپس میں بانٹ لی۔

پولیس نے تمام ملزمان کے خلاف کوتوالی کٹرا پولیس اسٹیشن میں آرمس ایکٹ کے تحت مقدمہ درج کرکے انہیں جیل بھیج دیا ہے۔

---------------

ہندوستان سماچار / عبدالسلام صدیقی