پیانگ یانگ (شمالی کوریا)، 20 اگست (ہ س)۔

شمالی کوریا کے رہنما کم جونگ ان کی بااثر بہن کم یو جونگ نے بدھ کے روز جنوبی کوریا کے صدر لی جے میونگ کی مصالحتی تجویز پر تنقید کی۔ انہوں نے کہا کہ سیول پیانگ یانگ کا سفارتی ہم منصب نہیں ہے۔ کم یو جونگ شمالی کوریا کی حکمران جماعت کی مرکزی کمیٹی کی ڈپٹی ڈائریکٹر ہیں۔

کوریا ٹائمز اخبار نے شمالی کوریا کی کورین سنٹرل نیوز ایجنسی (KCNA) کا حوالہ دیتے ہوئے اطلاع دی ہے کہ کم یو جونگ نے یہ تبصرہ گزشتہ روز وزارت خارجہ کے ڈائریکٹر جنرل کے ساتھ ملاقات میں کیا۔ کم نے جنوبی کوریا اور امریکہ کے درمیان جاری فوجی مشقوں کی بھی مذمت کی۔ انہوں نے کہا کہ صدر لی تاریخ کا دھارا بدلنے کی اہلیت نہیں رکھتے۔

کم یو جونگ نے کہا، جنوبی کوریا کو ہمارے ملک کے ارد گرد مرکوز علاقائی سفارتی فورم میں سب سے چھوٹا کردار بھی نہیں دیا جائے گا۔ جمہوریہ کوریا ہمارا سفارتی ہم منصب نہیں ہو سکتا۔ کم کا یہ تبصرہ سیول کی طرف سے دیرینہ خراب بین کوریائی تعلقات کو بہتر بنانے کے اقدام کے بعد آیا ہے۔

گزشتہ ہفتے یوم آزادی کی اپنی تقریر میں، جنوبی کوریا کے صدر لی جے میونگ نے کہا تھا کہ وہ شمالی کوریا کے سیاسی نظام کا احترام کریں گے اور انضمام کے ذریعے اتحاد کی کوشش نہیں کریں گے۔ انہوں نے کشیدگی کو کم کرنے کے لیے 2018 سے معطل بین کوریائی فوجی معاہدے کی بحالی پر بھی زور دیا۔انہوں نے کچھ اقدامات کرنے کا بھی وعدہ کیا۔

ہندوستھان سماچار

ہندوستان سماچار / عطاءاللہ