نئی دہلی، 20 اگست (ہ س)۔ ہائی پروفائل ڈائمنڈ لیگ کے فائنل میں پہلے ہی پہنچ چکے اسٹار ہندوستانی نیزہ پھینکنے والے کھلاڑی نیرج چوپڑاجمعہ کے روز بیلجیئم کے برسلز میں منعقد ہونے والی باوقار سیریز کے آخری مرحلے میں شرکت نہیں کریں گے۔

ڈائمنڈ لیگ کے 14مقابلوں میں سے چار میں مردوں کی نیزہ پھینک ٹورنامنٹ شامل ہیں۔ چوپڑا نے صرف دو میں حصہ لیا لیکن 28 اگست کو سوئٹزرلینڈ کے زیورخ میں ہونے والے ڈائمنڈ لیگ کے فائنل کے لیے کوالیفائی کر گئے۔ انہوں نے 16 اگست کو سائلیسیا لیگ میں بھی حصہ نہیں لیا تھا۔ 27 سالہ موجودہ عالمی چیمپیئن نے مئی میں دوحہ ڈائمنڈ لیگ میں 90.23 میٹرنیزہ پھینک کر 90 میٹر کے نشان کو عبور کیا تھا لیکن جرمنی کے جولین ویبر کے بعد دوسرے نمبر پر رہے۔ اس کے بعد انہوں نے جون میں 88.16 میٹر نیزہ پھینک کر پیرس ڈائمنڈ لیگ جیتی۔

برسلز مرحلے کے بعد سرفہرست چھ جیولن تھروور زیورخ میں ڈائمنڈ لیگ کے فائنل میں پہنچیںگے۔ چوپڑا نے آخری بار 5 جولائی کو بنگلورو میں این سی کلاسک میں حصہ لیا تھا، جہاں انہوں نے 86.18 میٹر نیزہ پھینک کرخطاب جیتا تھا۔ اس سیزن میں اب تک وہ کل چھ ایونٹس میں حصہ لے چکے ہیں، ان میں سے چار جیتے اور دو بار دوسرے نمبر پر رہے۔ چوپڑا 13 سے 21 ستمبر تک ٹوکیو میں منعقد ہونے والی عالمی چیمپئن شپ میں اپنا خطاب برقرار رکھنے کی کوشش کریں گے۔

ڈائمنڈ لیگ عالمی ایتھلیٹکس میں ایک باوقار ایک روزہ مقابلہ سیریز ہے۔ 27 اور 28 اگست کو زیورخ میں منعقد ہونے والے دو روزہ ڈائمنڈ لیگ فائنل کے لیے کوالیفائی کرنے کے واسطے ایتھلیٹس 14 سیریز کے ٹورنامنٹ میں پوائنٹس کے لیے مقابلہ کرتے ہیں۔ ہر فاتح کو مایہناز ڈائمنڈ ٹرافی، انعامی رقم میں 30,000 امریکی ڈالر اور عالمی ایتھلیٹکس چیمپئن شپ کے لیے وائلڈ کارڈ سے نوازا جاتا ہے۔ دوسرے نمبر پر آنے والے کو 12,000 امریکی ڈالر اور تیسرے نمبر پر آنے والے ک7,000 امریکی ڈالرملیں گے۔

مردوں کے نیزہ پھینک مقابلے کا انعقاد 28 اگست کو کیا جائے گا۔ اس سال 32 میں سے آٹھ ایونٹس - 100 میٹر مرد، 1500 میٹر مرد، 400 میٹر مردوں کی ہرڈلز دوڑ، پول والٹ مرد، 100 میٹر خواتین، 100 میٹر ہرڈلز دوڑ خواتین، 3000 میٹر خواتین اور لانگ جمپ خواتین -کے فاتحین کو بڑھی ہوئی رقم ملے گی۔ ان مقابلوں میں جیتنے والے کو 50,000 امریکی ڈالر ملیں گے، جب کہ دوسرے اور تیسرے نمبر پر آنے والے کو بالترتیب 20,000امریکی ڈالر اور 10,000 امریکی ڈالر ملیں گے۔

ہندوستھان سماچار

ہندوستان سماچار / محمد شہزاد