نئی دہلی، 14 اگست (ہ س)۔ دہلی کے میئر راجہ اقبال سنگھ نے جمعرات کو سوک سینٹر میں کارپوریشن سکریٹری کے دفتر میں دہلی ڈیولپمنٹ اتھارٹی (ڈی ڈی اے) میں میونسپل کارپوریشن کے نمائندے کے عہدے کے لیے بی جے پی کی جانب سے بی ایس پنوار کے کاغذات نامزدگی داخل کیے۔
اس موقع پر ایوان کے لیڈر پرویش واہی، ڈپٹی میئر جے بھگوان یادو اور اسٹینڈنگ کمیٹی کے چیئرمین ستیہ شرما، کاغذات نامزدگی داخل کرنے والے کارپوریشن کونسلر بی ایس پنوار اور دیگر سینئر رہنما موجود تھے۔
میئر راجہ اقبال سنگھ نے کہا کہ یہ خوشی کی بات ہے کہ ڈی ڈی اے کے لیے کارپوریشن کے نمائندہ رکن کے لیے بی جے پی کونسلر بی ایس پنوار کی نامزدگی داخل کی جا رہی ہے اور اس سے کارپوریشن کی ترقی کو تقویت ملے گی۔
قائد ایوان پرویش واہی نے کہا کہ بی جے پی اور اے اے پی دونوں اپنے کونسلروں کے تناسب سے ڈی ڈی اے میں ایم سی ڈی کے نمائندے کے عہدے کے لیے ایک ایک امیدوار کو نامزد کر رہے ہیں۔ اس لیے اس الیکشن میں دونوں جماعتوں کے منتخب امیدواروں کا اس عہدے پر بلا مقابلہ منتخب ہونا یقینی ہے۔ انہوں نے کہا کہ عام آدمی پارٹی نے جان بوجھ کر ڈھائی سال سے ڈی ڈی اے کے لئے دہلی میونسپل کارپوریشن کے نمائندے کا انتخاب نہیں ہونے دیا ہے۔
واہی نے کہا کہ اب بی جے پی کے دور حکومت میں اسٹینڈنگ کمیٹی اور تمام قانونی، خصوصی اور ایڈہاک کمیٹیاں تشکیل دی گئی ہیں اور ڈی ڈی اے میں دہلی میونسپل کارپوریشن کے نمائندوں کی تقرری کے عمل کو بھی منظوری دے دی گئی ہے۔
وہیں عام آدمی پارٹی کے امیدوار کونسلر کرشنا دیوی راگھو نے بھی اپنا پرچہ نامزدگی داخل کیا۔
قابل ذکر ہے کہ ڈی ڈی اے میں دہلی میونسپل کارپوریشن کے نمائندے کے عہدے کے لیے انتخاب 21 اگست کو ایوان کی میٹنگ میں ہوگا۔اس عہدے کے لیے نامزدگی داخل کرنے کی آخری تاریخ 14 اگست تھی۔
ہندوستھا ن سماچار
ہندوستان سماچار / محمد شہزاد
