اتر پردیش کے وزیر اعلی یوگی آدتیہ ناتھ ہندوستانی سیاست میں ایک بااثر اور اہم نام ہیں۔ چند ماہ قبل ان کی زندگی پر مبنی بائیوپک کا اعلان کیا گیا تھا جس کی پہلی جھلک بھی سامنے آئی تھی۔ اب اس بایوپک کا نام 'اجے' رکھا گیا ہے اور اس کا ٹیزر بھی باضابطہ طور پر جاری کر دیا گیا ہے۔ اس کے ساتھ ہی فلم کی ریلیز کی تاریخ کا بھی اعلان کردیا گیا ہے جس سے اس فلم کے بارے میں شائقین کا تجسس بڑھ گیا ہے۔

یوگی آدتیہ ناتھ پر مبنی بائیوپک فلم 'اجے' کا ٹیزر جاری کر دیا گیا ہے جو 1 منٹ 16 سیکنڈ کا ہے۔ ٹیزر میں یوگی آدتیہ ناتھ کے ایک سنت بننے سے لے کر وزیر اعلیٰ بننے تک کے سفر کی جھلک دکھائی گئی ہے، جسے بہت متاثر کن انداز میں پیش کیا گیا ہے۔ 'اجے: دی ان ٹولڈ اسٹوری آف یوگی' کا ٹیزر یوگی آدتیہ ناتھ کی زور دار آواز سے شروع ہوتا ہے، وہ کہتے ہیں، میں سیاست دانوں کی طرح بات کرنا نہیں جانتا، وہ کہتے ہیں، وہ یوگی ہیں، وہ ہمیں کیا نقصان پہنچا سکتے ہیں۔ لیکن وہ بھول جاتے ہیں، چانکیہ بھی یوگی تھے، بھگوان پرشورام بھی یوگی تھے، یوگی کا وعدہ ہے۔ ریاست میں مافیا کو ان کے گھٹنے پر لاؤں گا اور ان سے معافی منگوائوں گا۔ اس زوردار مکالمے کے ساتھ ساتھ ٹیزر میں یوگی آدتیہ ناتھ کی شخصیت کی ایک متاثر کن جھلک نظر آتی ہے۔ ان کی جانفشانی، عزم اور قیادت کی جھلک فلم کے ہر فریم میں نظر آتی ہے، جس کی وجہ سے یہ بائیوپک پہلے ہی زیر بحث آچکی ہے۔

'12ویں فیل' فیم اداکار اننت جوشی اس فلم میں یوگی آدتیہ ناتھ کے کردار میں نظر آئیں گے۔ ٹیزر میں اننت جوشی کا زبردست روپ دیکھا جا سکتا ہے۔ اس کے علاوہ فلم 'اجے' میں پریش راول اور مشہور بھوجپوری اداکار نیروہوا اہم کرداروں میں نظر آئیں گے۔ فلم ’اجے‘ میں یوگی آدتیہ ناتھ کی زندگی کا سفر دکھایا جائے گا۔ یہ فلم شانتنو گپتا کی سب سے زیادہ فروخت ہونے والی کتاب 'دی مونک ہُو بیکیم چیف منسٹر' پر مبنی ہے۔ فلم کے ہدایت کار رویندر گوتم ہیں۔ یہ فلم یکم اگست کو سینما گھروں میں ریلیز کی جائے گی۔

---------------

ہندوستان سماچار / عبدالسلام صدیقی