سانبہ پولیس نے تین منشیات فروشوں کی جائیدادوں کو ضبط کیا

جموں، 3 جون (ہ س)۔ جموں و کشمیر پولیس نے منشیات کے غیر قانونی کاروبار کے خلاف کارروائیوں کا سلسلہ جاری رکھتے ہوئے ضلع سانبہ میں تین بدنامِ زمانہ منشیات فروشوں کی غیر قانونی جائیدادیں ضبط کر لیں۔ ضبط شدہ جائیدادوں میں تین رہائشی مکانات شامل ہیں جن کی مجموعی مالیت 81 لاکھ روپے بتائی گئی ہے۔

پولیس کے مطابق یہ کارروائی نارکوٹک ڈرگس اینڈ سائیکوٹرپک سبسٹینسز ایکٹ کے تحت عمل میں لائی گئی۔ جن ملزمان کے مکانات ضبط کیے گئے ہیں ان کی شناخت محمد یونس، معصوم علی عرف کالا اور شمس دین عرف بچو کے طور پر ہوئی ہے۔ تینوں کا تعلق تحصیل وجے پور کے گاؤں راکھ بروٹیاں سے ہے۔

حکام کے مطابق ملزمان کے خلاف سال 2023 اور 2025 میں تھانہ وجے پور میں این ڈی پی ایس ایکٹ کے تحت الگ الگ مقدمات درج کیے گئے تھے۔ تفتیش کے دوران انکشاف ہوا کہ مذکورہ افراد نے منشیات کی غیر قانونی اسمگلنگ سے حاصل ہونے والی رقم سے یہ جائیدادیں حاصل کی تھیں، جو قانوناً ضبطی کے زمرے میں آتی ہیں۔

پولیس نے ان مکانات کو غیر قانونی ذرائع سے حاصل شدہ جائیداد قرار دیتے ہوئے باقاعدہ قانونی کارروائی کے بعد انہیں منسلک کر لیا ہے۔پولیس حکام کا کہنا ہے کہ منشیات فروشوں کے خلاف سخت کارروائی کا یہ سلسلہ مستقبل میں بھی جاری رہے گا تاکہ نوجوان نسل کو اس خطرناک لعنت سے بچایا جا سکے اور معاشرے کو منشیات کے ناسور سے پاک کیا جا سکے۔

ہندوستھان سماچار

---------------

ہندوستان سماچار / محمد اصغر