پٹنہ،19جون(ہ س)۔ بہار کی راجدھانی پٹنہ کے انتہائی حساس اور ہائی سیکورٹی والے علاقے میں جمعہ کی صبح بدمعاشوں نے ایک نوجوان کو لوٹنے کے ساتھ ساتھ اس پر فائرنگ بھی کر دی۔ واقعہ پٹنہ ایئرپورٹ تھانہ علاقے کے پولو روڈ پر پیش آیا، جو وزیر اعلیٰ کی رہائش، نائب وزیر اعلیٰ کی رہائش، اپوزیشن لیڈر اور کئی بڑے وزراء اور ججوں کے گھروں کے قریب ہے۔ اس واقعہ نے پولیس اور انتظامیہ کے حفاظتی انتظامات پر سنگین سوالات کھڑے کردیئے ہیں۔واقعہ کی معلومات دیتے ہوئے متاثرہ راہل کمار (25 سال) کی ماں آشا دیوی نے بتایا کہ ان کا بیٹا ہر روز کی طرح پیدل ڈیوٹی پر جا رہا تھا۔ اس کے بعد پولو روڈ کے قریب دو نامعلوم موٹر سائیکل سواروں نے اسے گھیر لیا اور پستول دکھا کر ڈرایا۔ بدمعاشوں نے راہل کا موبائل فون اور 400 روپے چھین لیے ۔ واقعہ پٹنہ کے حساس ترین علاقوں میں سے ایک میں پیش آیا ہے جہاں وزیر اعلیٰ کی رہائش گاہ، نائب وزیر اعلیٰ کی رہائش گاہ، اسمبلی میں اپوزیشن لیڈر کا گھر اور کئی سینئر وزراء کی رہائش گاہیں واقع ہیں۔ اس کے علاوہ بہار ہائی کورٹ کے جج اور وزیر اشوک چودھری کی رہائش بھی اسی سڑک پر ہے۔ ایسے میں اس علاقے میں دن دہاڑے فائرنگ اور لوٹ کی وارداتوں نے پولیس کی چوکسی پر سوال کھڑے کر دیے ہیں۔واقعہ کی اطلاع ملتے ہی پولیس نے موقع پر پہنچ کر تفتیش شروع کردی۔ سکریٹریٹ ڈی ایس پی ڈاکٹر انو نے بتایا کہ معاملے کی سنگینی کو دیکھتے ہوئے ایک خصوصی ٹیم تشکیل دی گئی ہے۔ہندوستھان سماچار

ہندوستان سماچار / Mohammad Afzal Hassan