۔بارسلونا کی 4-3 کی شاندار جیت، رافینہا نے دو گول کیے،ایمباپے کی ہیٹ ٹرک ضائع

بارسلونا، 12 مئی (ہ س)۔ بارسلونا نے لا لیگا میں اتوار کو کھیلے گئے ایل کلاسیکو میچ میں ریئل میڈرڈ کو 4-3 سے شکست دے کر خطاب کی جانب ایک قدم اور بڑھا دیا ہے ۔ اس جیت کے ساتھ ہی بارسلونا نے ٹیبل میں میڈرڈ پر سات پوائنٹس کی برتری حاصل کر لی ہے اور صرف تین میچ باقی ہیں۔

ایمباپے کی ہیٹ ٹرک پر بھاری پڑا بارسلونا کا جذبہ

ریئل میڈرڈ کے لیے کائیلین ایمباپے نے ہیٹ ٹرک لگائی لیکن رافینہا کی جانب سے دو اور لامین یمال اور ایرک گارسیا کے ایک ایک گول نے بارسلونا کے لیے میچ کا رخ موڑ دیا۔

چیمپئنز لیگ سے باہر ہونے کے بعد اس میچ میں بارسلونا کے لیے کرو یا مرو کی صورتحال تھی لیکن کوچ ہینسی فلک کی ٹیم نے شاندار واپسی کرتے ہوئے چوتھے کلاسیکو میں بھی جیت درج کی ۔

ایمباپے نے دلائی ابتدائی برتری

ریئل میڈرڈ نے مضبوط آغاز کیا اور ایمباپے نے صرف چوتھے منٹ میں پنالٹی پر گول کر کے ٹیم کو برتری دلا دی۔ پنالٹی اس وقت ملی جب گول کیپر ووجشیچ شیچنی نے ایمباپے کوگرا دیا، حالانکہ بارسلونا نے آف سائیڈ کا مطالبہ کیا۔

ایمباپے نے 14ویں منٹ میں دوسرا گول کر کے میڈرڈ کو 2-0 کی برتری دلا دی۔ یہ ان کا 26 واں لیگ گول تھا، جس سے وہ رابرٹ لیوینڈوسکی کو پیچھے چھوڑ کر ٹاپ اسکورر بن گئے۔

رافینہا کا جوڑی اور یمال کا جادو

میڈرڈ کی برتری زیادہ دیر نہیں چل سکی۔ رافینہا نے صرف دو منٹ بعد گول کیا، پھر پہلے ہاف کے اختتامی لمحات میں انہوں نے لوکاس وازکیز سے گیند چھیننے کے بعد دوسرا گول بھی کر ڈالا۔

لامین یمال نے بھی میچ میں شاندار کھیل کا مظاہرہ کیا۔ انہوں نے بھی ایک گول کیا، جبکہ ایک ہیڈر پر رافینہا کو شاندار کراس فراہم کیا جوگول میں تبدیل نہیں ہو سکا۔

ایمباپے کی تیسری کامیابی، لیکن فتح نہ دلا سکے

دوسرے ہاف میں ایمباپے نے وینیشیش جونیئر کی مدد سے تیسرا گول کر کے اپنی ہیٹ ٹرک مکمل کر لی تاہم بارسلونا کے دفاع اور مڈ فیلڈ نے اس کے بعد کوئی بڑی غلطی نہیں کی۔وکٹر منوز کے پاس اختتام کے قریب اسکور برابر کرنے کا موقع تھا لیکن انہوں نے گیند کو اوپر مار دیا۔

ہندوستھان سماچار

ہندوستان سماچار / محمد شہزاد