جموں, 25 اپریل (ہ س)ضلع انتظامیہ کٹھوعہ نے غیر قانونی تجاوزات کے خلاف سخت موقف اختیار کرتے ہوئے تحصیل کٹھوعہ کے گاؤں بسنت پور میں اہم کارروائی عمل میں لائی، جس کے دوران قیمتی سرکاری اراضی کو ناجائز قبضے سے واگزار کروایا گیا۔یہ کارروائی ڈپٹی کمشنر ڈاکٹر راکیش منہاس کی نگرانی اور رہنمائی میں ریونیو ٹیم کی جانب سے انجام دی گئی۔ کارروائی کے دوران کھسرہ نمبر 254 پر غیر قانونی طور پر تعمیر کی گئی ایک جھونپڑی کو منہدم کیا گیا، جبکہ کھسرہ نمبر 213 پر ریاستی زمین پر تعمیر شدہ ایک دکان کو بھی مسمار کر دیا گیا۔انتظامیہ کے مطابق یہ کارروائی تجاوزات کے خلاف جاری مہم کا حصہ ہے، جس کا مقصد سرکاری اراضی کو ناجائز قبضوں سے بچانا اور قانون کی عملداری کو یقینی بنانا ہے۔ ضلع حکام نے واضح کیا ہے کہ مستقبل میں بھی ایسی کارروائیاں تسلسل کے ساتھ جاری رہیں گی، اور کسی کو بھی سرکاری زمین پر ناجائز قبضہ کرنے کی اجازت نہیں دی جائے گی۔

ہندوستھان سماچار

---------------

ہندوستان سماچار / محمد اصغر