اورنگ آباد، 26 مارچ (ہ س)۔ اورنگ آباد-پونے ایکسپریس وے، جس کی لاگت تقریباً

25 ہزار کروڑ روپے ہے، زمین کے حصول میں درپیش مشکلات کے باعث تاخیر کا شکار ہو

گیا ہے۔ پہلے ہی کئی چیلنجز کا سامنا کرنے والے اس منصوبے کی تکمیل کا نیا ہدف

جنوری 2026 مقرر کیا گیا ہے۔

اس ایکسپریس وے کا ایک اہم حصہ پونے سے شیرور تک 53

کلومیٹر طویل ہے، جس میں چھ لین والی سڑک کی تعمیر بھی شامل ہے۔ اس کے بغیر یہ منصوبہ مکمل

نہیں ہو سکتا۔ نیشنل ہائی ویز اتھارٹی آف انڈیا (این ایچ اے آئی) نے واضح کیا ہے

کہ اگرچہ منصوبے میں تاخیر ہوئی ہے، لیکن اس کے مجوزہ راستے میں کوئی تبدیلی نہیں

کی جائے گی۔

جون 2024 میں مہاراشٹر اسٹیٹ انفراسٹرکچر ڈیولپمنٹ

کارپوریشن (ایم ایس آئی ڈی سی) اور این ایچ اے آئی کے درمیان اس منصوبے کے لیے ایک

معاہدہ طے پایا تھا۔ جلتا میں مٹی کی جانچ مکمل ہو چکی ہے، لیکن زمین کے حصول کا

عمل اب تک سست روی کا شکار ہے۔ منصوبے کا اعلان 33 ماہ قبل کیا گیا تھا، مگر زمین

کے حصول میں خاطرخواہ پیش رفت نہیں ہو سکی۔ زمین کے باضابطہ حصول کے لیے 3 (اے)

نوٹیفکیشن جاری ہوئے 26 ماہ گزر چکے ہیں، لیکن عمل مکمل نہیں ہو سکا۔

رپورٹ کے مطابق اورنگ آباد، احمد نگر اور پونے کے

ضلعی کلکٹر دفاتر ایم ایس آئی ڈی سی کے ساتھ مل کر حصول اراضی کے عمل کی نگرانی کر

رہے ہیں۔ ایکسپریس وے کئی دیہاتوں سے گزرے گا، جن میں پیر واڑی، ہیرا پور،

سندرواڑی، جلتا، اڈگاؤں بڈروک، چنچولی، گھرڈون اور اورنگ آباد تعلقہ کے دیگر گاؤں

شامل ہیں۔ مزید برآں، بڈکن کے قریب ایک صنعتی منصوبے کے پیش نظر ایکسپریس وے کی

سیدھ میں معمولی ردوبدل کیا جائے گا۔

اس بڑے منصوبے کے ساتھ اورنگ آباد-پونے کے موجودہ

راستے کی تزئین و آرائش پر بھی کام کیا جائے گا، جس پر تقریباً 9 ہزار کروڑ روپے

کی لاگت آئے گی۔

اس پروجیکٹ کو پہلے ہی ایم ایس آئی ڈی سی کے سپرد کر دیا گیا ہے۔

مہاراشٹر حکومت نے اس شاہراہ کو قومی شاہراہ کا درجہ دینے کی کوششیں شروع کر دی

ہیں، اور اسے این ایچ-753 ایف کا نام دیا گیا ہے۔

ہندوستھان

سماچار

--------------------

ہندوستان سماچار / نثار احمد خان