جموں, 17 مارچ (ہ س)جموں و کشمیر کے نائب وزیر اعلیٰ سریندر چودھری نے نوشہرہ میں جاری مختلف ترقیاتی منصوبوں کا تفصیلی دورہ کیا اور ان کے پیش رفت کا جائزہ لیا۔انہوں نے آشرم، ٹاؤن ہال، شاپنگ کمپلیکس اور اسپتال کی عمارت کا معائنہ کیا اور ترقیاتی کاموں کو مقررہ وقت میں مکمل کرنے کی اہمیت پر زور دیا تاکہ عوامی سہولیات کو بہتر بنایا جا سکے۔دورے کے دوران، نائب وزیر اعلیٰ نے تعمیراتی کاموں کے معیار کا جائزہ لیا اور متعلقہ ایجنسیوں کو ہدایت دی کہ وہ کام کی رفتار کو تیز کریں اور معیار کو برقرار رکھیں۔ انہوں نے موقع پر موجود افسران اور مقامی افراد سے بھی ملاقات کی اور علاقائی ترقیات پر ان کی رائے لی۔اسپتال کی عمارت کا جائزہ لیتے ہوئے، انہوں نے اس میں جدید طبی سہولیات کی فراہمی پر زور دیا تاکہ عوام کو بہتر صحت کی خدمات فراہم کی جا سکیں۔شاپنگ کمپلیکس کے حوالے سے، انہوں نے مقامی کاروبار کو فروغ دینے کے اقدامات پر تبادلہ خیال کیا اور منصوبے کی جلد تکمیل پر زور دیا تاکہ اقتصادی ترقی کو تقویت ملے۔ٹاؤن ہال کے کام کا جائزہ لیتے ہوئے، نائب وزیر اعلیٰ نے اسے ایک متحرک عوامی مقام میں تبدیل کرنے کی ضرورت پر زور دیا تاکہ کمیونٹی کی سرگرمیوں کو فروغ دیا جا سکے۔انہوں نے آشرم کا بھی دورہ کیا اور وہاں سہولیات میں مزید بہتری لانے کے لیے مکمل تعاون کی یقین دہانی کرائی تاکہ رہائشیوں اور یاتریوں کو فائدہ پہنچے۔نائب وزیر اعلیٰ نے حکومت کی جانب سے ترقیاتی منصوبوں کو تیز کرنے کے عزم کا اعادہ کیا اور متعلقہ حکام کو ہدایت دی کہ کسی بھی رکاوٹ کو فوری طور پر دور کر کے تمام منصوبوں کو مقررہ مدت میں مکمل کیا جائے۔

ہندوستھان سماچار

---------------

ہندوستان سماچار / محمد اصغر