نئی دہلی، 12 مارچ (ہ س)۔علی گڑھ مسلم یونیورسٹی کے سابق پروفیسر، معروف عالم دین، میرٹھ کے شہر قاضی مولانا زین الساجدین صدیقی قاسمی کے انتقال پر جمعیة علماءہند کے صدر مولانا محمود اسعد مدنی نے گہرے رنج و غم کا اظہار کیا ہے۔ انھوں نے اپنے تعزیتی بیان میںکہا کہ مرحوم دارالعلوم دیوبند کے فاضل اور علی گڑھ مسلم یونیورسٹی کے شعبہ سنی دینیات کے استاذ ہونے کے ساتھ ساتھ ایک سنجیدہ فکر کے حامل تھے۔ انہوں نے علمی اور تحقیقی میدان میں قابل تعریف خدمات انجام دی ہیں بالخصوص جدید نصاب دینیات کی ترتیب اور امام اوزاعیہ کی سوانح پر ان کی تحقیقات قابل قدر علمی سرمایہ ہیں۔ان کا خاندان فقہی خدمات کے حوالے سے بھی منفرد حیثیت رکھتا ہے۔ ان کے والد بزرگوار قاضی زین العابدین سجاد ودیگر بزرگوں نے جمعیة علماءہند کے پلیٹ فارم سے قومی اور دینی تحریکوں میں بھرپور کردار ادا کیا۔ خود مولانا قاضی زین الساجدین صدیقی قاسمی? بھی محکمہ شرعیہ میرٹھ کے صدر اور جمعیة علماءمیرٹھ کے معزز رکن کی حیثیت سے شرعی و سماجی خدمات میں مصروف رہے۔

واضح ہو کہ مرحوم کی نماز جنازہ میں جمعیة علماءہند کے جنرل سیکریٹری مولانا محمد حکیم الدین قاسمی صاحب کی قیادت میں ایک مرکزی وفد نے شرکت کی، وفد میں مفتی ذاکر حسین قاسمی ، حافظ ابوبکر وغیرہم شامل تھے۔ وفد نے اس موقع پر صدر جمعیة علماءہند مولانا محمود اسعد مدنی کا تعزیتی خط پیش کیا، صدر جمعیةعلماءہند نے دعا کی ہے کہ اللہ تعالیٰ مرحوم کی مغفرت فرمائے، درجات بلند کرے اور ان کے اہل خانہ کو صبر جمیل عطا فرمائے۔ آمین۔ہندوستھان سماچار

ہندوستان سماچار / Md Owais Owais