نئی دہلی، 19 فروری (ہ س)۔ دہلی کے نئے وزیر اعلیٰ کے عہدے کو لے کر پیدا ہونے والی غیر یقینی صورتحال آج ختم ہو گئی۔ بھارتیہ جنتا پارٹی نے آج شام پارٹی کے دہلی ریاستی ہیڈکوارٹر میں وزیر اعلیٰ کے عہدے کے لیے شالیمار باغ کی ایم ایل اے ریکھا گپتا کے نام کا اعلان کیا۔ ریکھا گپتا دہلی کی نئی وزیر اعلیٰ ہوں گی۔ وہ کچھ ہی دیر میں دہلی کے لیفٹیننٹ گورنر ونے کمار سکسینہ سے ملاقات کریں گی اور حکومت بنانے کا دعویٰ پیش کریں گی۔ وہ 20 فروری کو دہلی کے رام لیلا میدان میں عہدے اور رازداری کا حلف لیں گی۔

آج شام دہلی ریاستی بی جے پی دفتر میں منعقدہ لیجسلیچر پارٹی کی میٹنگ میں نئی دہلی کے ایم ایل اے پرویش ورما اور روہنی کے ایم ایل اے وجیندر گپتا نے ریکھا گپتا کے نام کی تجویز پیش کی، جس کی سب نے صوتی ووٹوں سے حمایت کی۔ اس سے پہلے جب شام 7 بجے قانون ساز پارٹی کی میٹنگ شروع ہوئی تو شالیمار باغ سے ایم ایل اے منتخب ہونے والی ریکھا گپتا کو وزیر اعلیٰ کے عہدے کے لیے سب سے مضبوط دعویدار تصور کیا جا رہا تھا۔ کیونکہ ملک کی جن ریاستوں میں اس وقت بی جے پی کی حکومتیں ہیں، وہاں کوئی خاتون وزیر اعلیٰ نہیں ہے۔ بدھ کو جب ریکھا گپتا قانون ساز پارٹی کی میٹنگ کے لیے آئیں تو وہ میڈیا کے سامنے جیت کا نشان (وِکٹری سائن)دکھا کر سب کی مبارکباد قبول کر رہی تھیں۔

ریکھا گپتا کا تعلق ویشیہ برادری سے ہے، جن کی دہلی میں خاصی تعداد ہے۔ ویشیہ برادری کو بی جے پی کا بنیادی ووٹر سمجھا جاتا ہے۔ ریکھا گپتا دہلی بی جے پی کی جنرل سکریٹری اور بی جے پی مہیلا مورچہ کی قومی نائب صدر بھی ہیں۔ 50 سالہ ریکھا گپتا جنوبی دہلی میونسپل کارپوریشن کی میئر بھی رہ چکی ہیں۔

ریکھا گپتا کی تعلیم کے بارے میں بات کریں تو انہوں نے ایل ایل بی کی تعلیم حاصل کی ہے۔ ریکھا گپتا کی پیدائش 1974 میں نند گڑھ گاو¿ں، جولانہ سب ڈویژن،جیند ضلع، ہریانہ میں ہوئی۔

وہ بچپن میں اپنے والد کے ساتھ دہلی آگئی تھیں۔ طالب علمی کے دوران ہی اے بی وی پی کے ذریعے سیاست میں قدم رکھا۔ وہ دہلی یونیورسٹی اسٹوڈنٹس یونین کی سکریٹری رہ چکی ہیں۔ ریکھا گپتا کے والد اسٹیٹ بینک آف انڈیا میں منیجر تھے۔ اس ملازمت کے دوران ان کے والد خاندان کے ساتھ دہلی شفٹ ہو گئے۔ ریکھا گپتا نے شالیمار باغ اسمبلی سیٹ سے عام آدمی پارٹی کی امیدوار وندنا کماری کو شکست دے کر دہلی اسمبلی انتخابات میں کامیابی حاصل کی ہے۔ ریکھا گپتا کو کل 68200 ووٹ ملے جبکہ عام آدمی پارٹی کی وندنا کماری 38605 ووٹوں کے ساتھ دوسرے نمبر پر رہیں۔ یہاں کانگریس کے پروین کمار جین 4892 ووٹوں کے ساتھ تیسرے نمبر پر رہے۔

ہندوستھا ن سماچار

ہندوستان سماچار / محمد شہزاد