بھاگلپور، 27 اکتوبر (ہ س)۔ضلع کے نوگچھیا سب ڈویژن کے اسماعیل پور بلاک میں نوتولیہ بجرنگ بلی مندر کے پاس پیر کے روز گنگا میں نہاتے ہوئے چار بچے ڈوب گئے۔ بتایا جاتا ہے کہ ایک بچہ نہاتے ہوئے گہرے پانی میں چلا گیا۔ اسے بچانے کی کوشش کے دوران تین دیگر بچے بھی گہرے پانی میں چلے گئے جس کے نتیجے میں ان کی موت ہو گئی۔ سابق مکھیا منوہر کمار منڈل اور موجودہ مکھیا انیل کمار نے بتایا کہ تمام بچے اپنے گھر سے دو سائیکلوں پر نوتولیہ گھاٹ پر نہانے آئے تھے۔ جب وہ نہانے لگے تو ایک بچہ گہرے پانی میں ڈوب گیا۔ بچے کو بچانے کی کوشش کے دوران دیگر تین بچے بھی ڈوب گئے۔ بچوں میں سے ایک کی شناخت نوتولیہ کے متھلیش منڈل کے 10 سالہ بیٹے کے طور پر کی گئی ہے۔ باقی تین بچوں کا تعلق چھٹھو سنگھ ٹولہ سے بتایا جاتا ہے۔جیسے ہی محکمہ صحت کو اس واقعہ کی اطلاع ملی فوری طور پر نوگچھیا اور گوپال پور سے ایمبولینس روانہ کی گئی۔ حالانکہ بچوں نے پہلے ہی گنگا میں آخری سانس لے لی تھی۔ جب انہیں مقامی اسپتال لایا گیا تو ڈاکٹر نے انہیں مردہ قرار دے دیا۔ تمام بچوں کی عمریں 15 سال سے کم بتائی جاتی ہیں۔ ادھر پولیس جائے وقوعہ پر پہنچ گئی اور واقعہ کی تحقیقات کر رہی ہے۔ہندوستھان سماچار

ہندوستان سماچار / Mohammad Afzal Hassan