لیہہ ایپکس باڈی نے 18 اکتوبر کو خاموش احتجاج کا اعلان کیا

لداخ، 17 اکتوبر (ہ س)۔ مرکز کے زیر انتظام علاقے لداخ کی تنظیم لیہہ اپیکس باڈی (ایل اے بی) نے 18 اکتوبر کو دو گھنٹے کی خاموش مارچ اور تین گھنٹے کے بلیک آؤٹ کا اعلان کیا ہے، تاکہ گزشتہ ماہ ہونے والے تشدد میں جاں بحق چار افراد اور زخمیوں کے اہلِ خانہ کے ساتھ یکجہتی ظاہر کی جا سکے۔ ایل اے بی نے اپنے بیان میں کہا کہ یہ پُرامن احتجاج ان نوجوانوں کی فوری رہائی کے مطالبے کے لیے بھی ہے جو حالیہ پرتشدد واقعات کے دوران حراست میں لیے گئے ہیں۔

تنظیم نے بتایا کہ خاموش مارچ صبح 11 بجے نامگیال چوک سے شانتی اسٹوپا تک نکالی جائے گی، جب کہ شام 6 بجے سے رات 9 بجے تک بلیک آؤٹ رکھا جائے گا۔ اس موقع پر کوئی نعرے، تقاریر یا پلے کارڈ نہیں ہوں گے، صرف خاموشی کے ذریعے پیغام دیا جائے گا کہ لداخ پُرامن بھی ہے اور متحد بھی ہیں۔ ایل اے بی نے کہا کہ شرکاء بازوؤں پر سیاہ پٹیاں باندھ کر احتجاج کریں گے جو مزاحمت، غم اور اتحاد کی علامت ہوں گی۔ اسی نوعیت کے احتجاج کرگل سمیت لداخ کے تمام بلاک سطحوں پر بھی منعقد کیے جائیں گے۔

بیان میں مزید کہا گیا کہ عوام سے اپیل کی جاتی ہے کہ آئندہ تین ماہ تک شادی یا دیگر تقریبات میں موسیقی بجانے اور روایتی ساز جیسے دمن اور سورنا کے استعمال سے گریز کریں تاکہ لداخ ان جاں بحق شہریوں کے لیے اجتماعی سوگ کا ماحول برقرار رکھ سکے۔ یاد رہے کہ منگل کو لیہ اپیکس باڈی اور کرگل ڈیموکریٹک الائنس (کے ڈی اے) نے ریاستی درجہ، آئین کی چھٹی شیڈول کے تحت تحفظات اور گزشتہ ماہ کے تشدد کی عدالتی تحقیقات کے مطالبے کو دہراتے ہوئے نئی احتجاجی حکمتِ عملی کا اعلان کیا تھا۔

ہندوستھان سماچار

---------------

ہندوستان سماچار / محمد اصغر