ورنگل, 15 ستمبر (ہ س) ورنگل سائبر کرائم پولیس نے تلنگانہ سائبر سیکیورٹی بیورو کے تحت ایک بڑی کارروائی کرتے ہوئے راجستھان سے تعلق رکھنے والے ایک سائبر مجرم کو گرفتار کیا ہے جو ملک بھر میں سرمایہ کاری کے نام پر لوگوں کو دھوکہ دے کر کروڑوں روپے کما رہا تھا۔ورنگل سائبر کرائمز کے اے سی پی وجے کمار نے اس گرفتاری کی تفصیلات فراہم کرتے ہوئے بتایا کہ راجستھان کے دیگانہ قصبے سے تعلق رکھنے والا کالو رام (33) گزشتہ چند دنوں سے ملک بھر میں 12 سے زائد جرائم میں ملوث رہا ہے۔کالو رام لوگوں کو آن لائن سرمایہ کاری پر زیادہ منافع کا لالچ دے کر انہیں دھوکہ دے رہا تھا۔ اس نے تلنگانہ میں بھی دو جرائم کا ارتکاب کیا، جن میں سے حال ہی میں ہنوماکونڈہ کے ایک معروف ڈاکٹر کو 21 لاکھ روپے کی سرمایہ کاری کے نام پر دھوکہ دیا گیا تھا۔ جب متاثرہ ڈاکٹر کو اس فراڈ کا علم ہوا، تو انہوں نے فوراً سائبر پولیس سے رجوع کیا۔سائبر کرائم کے اے سی پی وجے کمار کی قیادت میں تحقیقات شروع کی گئیں اور خصوصی سائبر ٹیم نے ملزم کے ٹھکانے کا پتہ لگا کر اسے راجستھان میں گرفتار کیا اور ورنگل کمشنریٹ منتقل کردیا۔ اس کارروائی میں سائبر کرائم کے انسپکٹر روی کمار، ایس اے آئی چرن، شیوکمار، اے اے او سلمان پاشا، کانسٹیبل کشور کمار، انجانیولو، راجو اور سائبر ونگ کے دیگر اہلکاروں نے اہم کردار ادا کیا۔ورنگل پولیس کمشنر امبر کشور جھا نے سائبر ٹیم کے افسران کی اس کامیاب کارروائی پر انہیں مبارکباد پیش کی اور ان کی کارکردگی کو سراہا۔

ہندوستھان سماچار

ہندوستان سماچار / محمدعبدالخالق