فیروز آباد، 17 ستمبر (ہ س)۔ تھانہ لائن پار علاقہ کے تحت منگل کی صبح مارننگ واک پر نکلے بی جے پی لیڈر اور کونسلر کو نامعلوم حملہ آوروں نے گولی مار دی۔ شدید زخمی بی جے پی کونسلر کو علاج کے لیے آگرہ کے سرکاری ٹراما سینٹر ریفر کر دیا گیا ہے۔ پولیس معاملے کی تحقیقات میں مصروف ہے۔

ضلع کے لائن پار تھانہ علاقے کے تحت لیبر کالونی کے رہنے والے علیم بھولا میونسپل کارپوریشن فیروز آباد کے وارڈ نمبر 48 سے کونسلر ہیں اور بی جے پی کے مقامی رہنما بھی ہیں۔ وہ منگل کی صبح صبح کی سیر کے لیے نکلے تھے۔ جیسے ہی وہ لیبر کالونی میں واقع اوور برج پر پہنچے تو نامعلوم حملہ آوروں نے ان پر فائرنگ کردی۔ گولی لگنے سے کونسلر شدید زخمی ہو گیے۔ اس واقعہ سے علاقہ میں کہرام مچ گیا۔ موقع پر لوگوں کی بڑی بھیڑ جمع ہوگئی۔ واردات کے بعد حملہ آور موقع سے فرار ہوگئے۔

اطلاع ملتے ہی لواحقین کے ساتھ تھانے کی پولیس موقع پر پہنچ گئی۔ پولیس نے زخمی کونسلر کو فوری طور پر ایمرجنسی گورنمنٹ ٹراما سنٹر میں علاج کے لیے بھیج دیا، جہاں ڈاکٹر نے کونسلر کی حالت تشویشناک ہونے پر ابتدائی طبی امداد کے بعد آگرہ ریفر کر دیا۔ زخمی کونسلر کے بیٹے عابد نے بتایا کہ ان کے والد پر صبح کی سیر کے لیے جاتے ہوئے حملہ کیا گیا۔ دو گولیاں لگیں، جس میں ایک کمر تو دوسری پیروں میں لگی ہے۔ لواحقین نے الزام لگایا ہے کہ یہ حملہ پرانی دشمنی کی وجہ سے ہوا ہے۔ اے ایس پی سٹی روی شنکر پرساد اور تھانہ پولیس نے جائے واردات کا معائنہ کیا اور اہل خانہ سے پوچھ گچھ کی۔ یہاں واقعہ کی اطلاع ملتے ہی بی جے پی لیڈر بھی اسپتال پہنچے۔ اے ایس پی سٹی روی شنکر پرساد کا کہنا ہے کہ معاملے کی جانچ کی جا رہی ہے اور کارروائی کی جا رہی ہے۔

ہندوستھان سماچار

ہندوستان سماچار / محمد شہزاد