نئی دہلی، یکم اگست (ہ س)۔ کانگریس لیڈر راہل اور پرینکا گاندھی نے جمعرات کو کیرالہ کے وائناڈ ضلع میں لینڈ سلائیڈنگ سے متاثرہ علاقوں اور مختلف ریلیف کیمپوں کا دورہ کیا۔ دونوں نے میپڑی میں گورنمنٹ ہائر سیکنڈری اسکول کا دورہ کیا اور تباہ کن لینڈ سلائیڈنگ سے متاثرہ خاندانوں کے ساتھ یکجہتی کا اظہار کیا۔ اس کے علاوہ انہوں نے میپڈی گرام پنچایت کے عہدیداروں اور عملے سے ملاقات کرکے صورتحال کا جائزہ لیا اور مدد کی پیشکش کی۔ اس دوران صحافیوں سے بات کرتے ہوئے کانگریس لیڈر راہل گاندھی نے کہا کہ آج وہ بھی ویسا ہی محسوس کر رہے ہیں جیسا کہ اپنے والد کی موت پر کیا تھا۔ یہاں لوگوں نے نہ صرف اپنے والد بلکہ اپنے پورے خاندان کو کھو دیا ہے۔ پورے ملک کی توجہ وایناڈ پر مرکوز ہے۔ راہل گاندھی نے لینڈ سلائیڈنگ کے واقعہ کو وائناڈ، کیرالہ اور ملک کے لیے ایک خوفناک سانحہ قرار دیا۔ انہوں نے کہا کہ وہ صورتحال کا جائزہ لینے آئے ہیں۔ یہ افسوسناک ہے کہ کتنے لوگ اپنے خاندان کے افراد اور اپنے گھروں کو کھو چکے ہیں۔ ہم مدد کرنے کی کوشش کریں گے اور اس بات کو یقینی بنائیں گے کہ پسماندگان کو ان کے جائز حقوق مل جائیں۔ وہیں پرینکا گاندھی نے کہا کہ انہوں نے پورا دن متاثرین سے ملنے میں گزارا۔ یہ ایک بہت بڑا المیہ ہے۔ ہم یہاں زیادہ سے زیادہ سہولیات اور مدد فراہم کرنے کے لیے موجود ہیں۔ ہماچل پردیش میں بھی ایسا ہی سانحہ پیش آیا ہے۔ کل ہم ملیں گے اور خاکہ پیش کریں گے کہ مزید مدد کیسے فراہم کی جا سکتی ہے۔ خاص کر یتیم بچوں کا۔ راہل گاندھی نے 2019 اور 2024 کے عام انتخابات میں وائناڈ لوک سبھا حلقہ سے کامیابی حاصل کی تھی۔ اس بار انہوں نے اتر پردیش کی رائے بریلی لوک سبھا سیٹ سے بھی کامیابی حاصل کی ہے جس کی وجہ سے انہوں نے وائناڈ حلقہ چھوڑ دیا ہے۔ اب پرینکا کی اس سیٹ پر ضمنی الیکشن لڑنے کی امید ہے۔ راہل گاندھی اور ان کی بہن پرینکا گاندھی واڈرا صبح 9.30 بجے کننور ہوائی اڈے پر اترے اور پھر سڑک کے ذریعے وائناڈ پہنچے۔ کانگریس کے جنرل سکریٹری اور الپوزا کے ایم پی کے سی وینوگوپال بھی ان کے ساتھ ہیں۔ موسلادھار بارش کی وجہ سے لینڈ سلائیڈنگ نے وائناڈ میں منڈکئی، چورلمالا، اتمالا اور نول پوزہ بستیوں کو متاثر کیا۔ منگل کی اولین ساعتوں میں منڈکئی، چورلمالا، اٹامالا اور نولاپوزا بستیوں میں لینڈ سلائیڈنگ کے نتیجے میں اب تک 173 افراد ہلاک ہو چکے ہیں، جن میں خواتین اور بچے بھی شامل ہیں۔

ہندوستان سماچار

ہندوستان سماچار / عبدالسلام صدیقی